«Ábden qutyrǵan, beti búlk etpeıdi»: Jelide aýyl muǵaliminiń sózi qyzý talqyǵa tústi

Foto: ashyq derekkóz

Jelide Mańǵystaý oblysy Túpqaraǵan aýdany Baýtıno aýylyndaǵy Gorkıı atyndaǵy mektep-lıeı muǵaliminiń túsirgen vıdeosy tarady, dep habarlaıdy   qandastar.kz Skifnews.kz aqparat portalyna silteme jasap.

Muǵalim oqýshysyna urysyp jatqanyn qyzdyń ápkesine ózi jibergen.

Vıdeoda muǵalim oqýshy qyzdan jempirin sheshýdi talap etedi.

«Búkil synyptyń aldynda men myna jempirdi sheshýin talap etemin. Bólme ystyq. Al ol «tońyp turmyn» deıdi. Beti búlk etpeı otyrǵanyn qarashy! Men uıaly telefonyn tapsyr dedim, óıtkeni test bolyp jatyr, biraq ol ony maǵan bermedi. Talaptarymdy oryndamaǵandyqtan, sabaqtan shyǵyp, úıine qaıtýyn suraımyn. Ábden qutyryp ketken! Kabınetten laqtyryp jibergim kelip tur», – dedi muǵalim.

Qyzdyń jaqyndary muǵalimniń sózderi etıkaǵa jat ekenin jáne ustaz mártebesine saı kelmeıtinin aıtyp, ony jazalaýdy talap etip otyr. Sózderinshe, muǵalim birneshe jyldan beri qyzdy qorlap kele jatyr. Jelidegi pikirlerden muǵalimniń 20 jyldyq eńbek ótili bar ekenin kórýge bolady.

Oblystyq bilim basqarmasynyń málimdeýinshe, Baýtıno aýylynyń muǵalimi tártiptik jazaǵa tartyldy.

«Másele komıssııa otyrysynda qaraldy. Komıssııanyń sheshimimen «Pedagogıkalyq ádeptiń keıbir máseleleri týraly» oqý-aǵartý mınıstrliginiń 2020 jylǵy 11 mamyrdaǵy № 190 buıryǵyna sáıkes, muǵalimtártiptik jaýapkershilikke tartyldy. Pedagogıkalyq etıkanyń negizgi qaǵıdalaryn buzǵany úshin «eskertý» berildi. Oqýshynyń ata-anasy mektepke shaqyryldy, biraq olar kelmedi», – dedi Túpqaraǵan aýdandyq bilim bóliminiń basshysy Aıbarshyn О́tesbaeva.