جاڭالىقتار
ادام اعزاسىن ساۋدالاۋمەن اينالىسقان قازاقستاندىق ۇستالدى
فوتو: polisia.kz
ادام اعزالارىن ساۋدالاۋمەن اينالىسقان حالىقارالىق قىلمىستىق توپتىڭ مۇشەسى بولعان دەپ ايىپتالعان 35 جاستاعى ايەل ۇستالدى, دەپ حابارلايدى qandastar.kz
قر ىشكى ىستەر مينيسترلىگىنىڭ ينتەرپول ۇلتتىق ورتالىق بيۋروسىنىڭ سۇرانىسى بويىنشا پولشا قۇقىق قورعاۋ ورگاندارى ۋكراينا-پولشا شەكاراسىنداعى تەمىرجول وتكىزۋ پۋنكتىندە 35 جاستاعى ايەلدى ۇستادى.
قازاقستان قۇقىق قورعاۋ ورگاندارى 2020 جىلى وعان حالىقارالىق ىزدەۋ جاريالاعان.
تەرگەۋ مالىمەتتەرىنە سايكەس, 2017-2018 جىلدارى بۇل قىلمىستىق توپ قازاقستانداعى مەديتسينالىق مەكەمەلەردە زاڭسىز ترانسپلانتاتسيا وپەراتسيالارىن ۇيىمداستىرعان.
قىلمىستىق سحەماعا يزرايل, ۋكراينا, قىرعىزستان, تاجىكستان جانە وزبەكستان ازاماتتارى تارتىلعان.
الدىن-الا مالىمەتتەرگە سۇيەنسەك, كۇدىكتى دونورلار مەن رەتسيپيەنتتەردى قارسى الىپ, ورنالاستىرۋ, ولاردىڭ مەديتسينالىق تەكسەرىستەن ءوتۋىن ۇيىمداستىرۋ, شىعىندارىن وتەۋ جانە قۇپيالىلىقتى ساقتاۋ جۇمىستارىمەن اينالىسقان.
سونداي-اق دونورلارعا رەتسيپيەنتتەرمەن تۋىستىق بايلانىستارى تۋرالى جالعان اقپاراتتى جاتتاتقىزعان.
قازىرگى ۋاقىتتا ۇستالعان كۇدىكتىنى قازاقستانعا ەكستراديتسيالاۋ ماسەلەسى قاراستىرىلىپ جاتىر. تەرگەۋ امالدارى جالعاسىپ جاتىر.
