«ادام ەمەس, شوشقالار»: سايرانداعى دەمالۋشىلار 19 مىڭ تەڭگەدەن ايىپپۇل ارقالادى

فوتو: ۆيدەودان سكرين

الماتىداعى سايران سۋ قويماسى قايتا جاڭعىرتۋدان كەيىن رەسمي تۇردە ءالى اشىلماسا دا, دەمالۋشىلاردىڭ سانى كۇننەن كۇنگە كوبەيىپ جاتىر. سول سەبەپتى وندا شومىلۋعا تىيىم سالىنعان. پوليتسيا قىزمەتكەرلەرى ءتۇسىندىرۋ جۇمىستارىن جۇرگىزگەنىمەن, شومىلعانى ءۇشىن ايىپپۇل سالا المايدى. ال دەمالىس ايماعىن لاستاعانى ءۇشىن ايىپپۇل كوزدەلگەن. قازىردىڭ وزىندە 20 ادام جاۋاپكەرشىلىككە تارتىلدى, دەپ جازدى qandastar.kz

بۇل تۋرالى Stan.kz اقپارات اگەنتتىگى كتك ارناسىنا سىلتەمە جاساپ حابارلايدى.

سايران كولى رەسمي تۇردە ءالى اشىلعان جوق, بىراق جاعالاۋ قازىردىڭ وزىندە قوقىسقا تولىپ قالعان. قۇمدا شەگە قاعىلعان تاقتايلار, بوتەلكەلەر مەن تاماقتىڭ قاپتامالارى شاشىلىپ جاتىر. قالدىقتار ءتىپتى سۋدىڭ ىشىندە قالقىپ ءجۇر. سوعان قاراماستان كولگە كۇن سايىن 4 مىڭعا دەيىن ادام كەلەدىسۋدا ەرەسەكتەر مەن بالالار ەش الاڭسىز شومىلىپ ءجۇر. پارك اۋماعىندا ازىرگە بىردە-ءبىر اجەتحانا جۇمىس ىستەمەيدى.

وسكەمەننەن بالالارىمەن كەلگەن كارولينا دۋمينيكا دەمالىس ايماعىنىڭ كۇيىن كورىپ ەندى وندا اياق باسپايمىن دەپ وتىر.

ء“بىز بۇل ساياباققا ەندى عانا كەلدىك, وسىندا سەرۋەندەپ ءجۇرمىز. بىراق سەرۋەندەپ جۇرگەندە اينالانىڭ لاستانىپ كەتكەنى كوزگە وتتاي باسىلادى. بۇل جاعىمسىز اسەر قالدىرادى. اسىرەسە, ءبىز سياقتى قوناقتارىندا قالانىڭ تازالىعىنا بايلانىستى جايسىز پىكىر قالىپتاسادى”, – دەيدى كارولينا دۋمينيكا.

كۇدايبەرگەن سابىر كولدىڭ قارسى بەتىندە تۇرادى. ول دا كۇن سايىن دەمالىس ايماعىنا دەمالۋعا ەمەس, تازالاۋعا كەلەدى. دوستارىمەن بىرگە قولعاپ, كۇرەك, قوقىس سالاتىن پاكەتتەر الىپ كەلەدى. سونداي-اق بۇل سۇمدىق كورىنىستى ۆيدەوعا ءتۇسىرىپ, ينتەرنەتكە جۇكتەيدى. ايتۋىنشا, وسىلايشا قالا تۇرعىندارىنا وزدەرىنەن كەيىن قوقىستى جيناۋ كەرەگىن جەتكىزگىسى كەلەدى.

“بۇل ءالى جابىق اۋماق, ءالى ۇلكەن قوقىس جاشىكتەرىن قويىپ ۇلگەرمەدى. ال حالىق كىرىپ العان. قوقىستارىن شاشىپ ءجۇر, ءتىپتى ارنايى جاشىككە تاستۋدى بىلمەيدى. قالاي بولسا, سولاي لاقتىرادى. بۇل ادام ەمەس, شوشقالار. نە بولسا دا, جاعىمسىز. بارىنە بىردەي «ارتتارىڭنان جيناڭدار» دەپ تۇسىندىرە المايسىڭ”, – دەيدى قۇدايبەرگەن سابىر.

سايران كولىنىڭ اينالاسىنداعى تازالىق ماسەلەسىن قالا اكىمى دە نازارعا الدى. دارحان ساتىبالدى تازالىق جۇمىستارى دۇرىس جۇرگىزىلمەگەنى ءۇشىن قالالىق قىزمەتتەرگە سوگىس بەردى. ول قوقىستى قىسقا مەرزىمدە شىعارۋدى تاپسىردى.

“سايران اۋماعىنا قوسىمشا شامامەن 130 قوقىس جاشىگىن ورناتۋ تۋرالى تاپسىرما بەرىلدى. پوليتسيا بەكەتتەرى كۇن سايىن تاڭەرتەڭنەن تۇنگى 2-گە دەيىن رەيد جۇرگىزەدى”, – دەدى الماتى قالاسىنىڭ قوعامدىق كەڭىستىكتى دامىتۋ باسقارماسىنىڭ ءباسپاسوز حاتشىسى ماحانبەت كوكىموۆ.

پوليتسيا قىزمەتكەرلەرى رەيدكە شىقتى. العاشىندا ولار ءتۇسىندىرۋ جۇمىستارىن جۇرگىزسە, ەندى قوقىس ءۇشىن ايىپپۇل سالا باستادى. 20 ادام ايىپپۇل ارقالادى. ولاردىڭ ارقايسىسى 19 جارىم مىڭ تەڭگەدەن تولەۋگە مىندەتتى.