«ادام ومىرىنە قاۋىپ توندىرەدى»: وڭ جاق ءرۋلدى كولىكتەر ەندى تاكسي قىزمەتىن كورسەتە المايدى

وڭ جاق ءرۋلدى كولىكتەر ەندى تاكسي قىزمەتىنەن الاستاتىلادى. مۇنداي تەمىر تۇلپارلاردى «ياندەكستاكسي» مەن Indriver كومپانيالارى ءوز پلاتفورماسىندا مۇلدەم تىركەمەيتىن بولادى. كولىك مينيسترلىگى قوس كومپانيامەن اراداعى كەلىسسوزدەر ناتيجەسىن مالىمدەدى, دەپ حابارلايدى KYN.KZ اقپارات اگەنتتىگى كتك ارناسىنا سىلتەمە جاساپ.

جاڭا تالاپ 2025 جىلدان باستاپ جۇزەگە اسىرىلادى. مينيسترلىك «ەسكى-قۇسقى كولىكتەردىڭ بارلىعىن وسىلايشا تاكسي قىزمەتىنە جولاتپايمىز» دەپ وتىر. قۇجاتىن قيتۇرقى ارەكەتتەرمەن سان تۇزەتىپ, سول جاق ءرۋلدى كولىككە اينالدىرعانداردىڭ دا ايلاسى بۇل جەردە ىسكە اسپايدى. مارات قاراباەۆ كۇن ساناپ تاكسي باعاسىنىڭ قىمباتتاپ جاتقانىنا دا توقتالدى.

ءمينيستردىڭ سوزىنشە, ۇكىمەت باعا ساياساتىن رەتتەۋگە ارالاسا الامايدى. سوندىقتان مونوپوليست كومپانيالار ويىنا كەلگەن باعانى قويىپ ءجۇر. ماسەلەنى ەلىمىزدە مەيلىنشە باسەكەلەس ورتا تۋعىزعان جاعدايدا عانا شەشۋگە بولادى ەكەن. ول ءۇشىن شەتەلدىك بىرقاتار كومپانيالارمەن كەلىسسوزدەر جۇرگىزىلۋدە.

«سول جاق ءرۋلدى كولىككە اينالعان وڭ جاق ءرۋلدى ماشينالار بار. ولار ادام ومىرىنە قاۋىپ توندىرەرى ءسوزسىز. سوندىقتان جاڭا ەرەجە ەشكىمدى اينالىپ وتپەيدى. ال باعا ساياساتىنا كەلەتىن بولساق, بۇگىندە قازاقستاندا بىرنەشە اگرەگاتور بار. جەكەلەگەن قالالاردا سۇرانىسقا يە. بىزگە BOLT كومپانياسى حابارلاستى. بۇل ەستونيانىڭ تاكسي قىزمەتى. بىلايشا ايتقاندا, ەۋروپاداعى «ياندەكس». ول بىزدىڭ نارىققا قىزىعۋشىلىق تانىتىپ وتىر», – دەدى قر كولىك ءمينيسترى مارات قاراباەۆ.