الەم جاڭالىقتارى
سوڭعى جىلدارى ەلدىڭ زارەسىن العان تەراكتىلەر قايدا ورىن الدى?
فوتو: ult.kz
تاۋەلسىز قازاقستان تاريحىنىڭ بەتتەرىندە وننان استام لاڭكەستىك ارەكەت ورىن الىپ, 100-گە جۋىق ادام قازا تاپتى. ولاردىڭ ەداۋىر بولىگى ءدىني سەبەپتەرمەن جاسالعان.
بىرىككەن ۇلتتار ۇيىمى تەرروريزمدى «جالپى جۇرتشىلىق, توپ نەمەسە جەكە تۇلعا اراسىندا ساياسي ماقساتتا تەررورلىق احۋال تۋعىزۋعا باعىتتالعان نەمەسە ەسەپتەلگەن قىلمىستىق ارەكەتتەر» دەپ انىقتايدى.
مەملەكەت باسشىسى قاسىم-جومارت توقاەۆ مۇنداي جان تۇرشىگەرلىك قىلمىستاردى اقتاۋعا بولمايدى دەپ سانايدى. كەز كەلگەن زاڭعا قارسى جانە دەسترۋكتيۆتى ارەكەتتەردىڭ, ونىڭ ىشىندە قاساقانا ارانداتۋشىلىقتىڭ جولىن كەسۋ قاتاڭ تۇردە جۇرگىزىلەدى.
سوڭعى 2 جىلداعى الەمدەگى ەڭ اتىشۋلى لاڭكەستىك ارەكەتتەردى ەسكە تۇسىرەيىك.
كۇنى كەشە, 23 ماۋسىم كەشكى ۋاقىتتا داعىستاندا ەكى تەراكت جاسالدى. سودىرلار ءبىر ۋاقىتتا ماحاچكالا مەن دەربەنتكە بەلگىسىز بىرەۋلەر اۆتومات قارۋىمەن شىركەۋ مەن سيناگوگانى, سونداي-اق جول پوليتسياسى بەكەتىن اتقىلاعان. شابۋىلدان سوڭ سيناگوگا ورتكە وراندى. تەررورلىق اكت سالدارىنان 15 پوليتسيا قىزمەتكەرى قازا تاپتى. ونداعان ادام جاراقات الدى. ينتەرفاكستىڭ حابارلاۋىنشا, وسى ۋاقىتقا دەيىن 6 لاڭكەستىڭ كوزى جويىلعان. رەسپۋبليكادا جەدەل شتاب قۇرىلدى. رەسەيدىڭ ۇلتتىق تەرروريزمگە قارسى كوميتەتى داعىستاندا تەرروريزمگە قارسى وپەراتسيا رەجيمى ەنگىزىلگەنىن حابارلادى: رەسپۋبليكاعا كىرۋ جانە شىعۋعا رۇقسات جوق.
كروكۋس سيتي حوللداعى تەراكت
2024 جىلدىڭ 22 ناۋرىزىندا كەشكە Crocus City Hall كونتسەرت زالىندا كامۋفلياج كيگەن بەس ادام عيماراتتاعى ادامدارعا وق جاۋدىردى. كەيىنىرەك ەكى جارىلىس ەستىلدى. وسىدان كەيىن كونتسەرت زالىندا ءورت شىقتى. شابۋىل سالدارىنان كەم دەگەندە 145 ادام (ونىڭ ىشىندە التى بالا) قازا تاۋىپ, 551 ادام جاراقات الدى. جارىلىستار مەن ءورت سالدارىنان كونتسەرت زالىنىڭ عيماراتى تولىعىمەن دەرلىك قيرادى.
بۇل شابۋىل قازىرگى رەسەي تاريحىنداعى ەڭ ءىرى تەراكتىلەردىڭ ءبىرى بولدى, قۇربان بولعاندار سانى بويىنشا بەسلانداعى تەراكتىدەن كەيىنگى ەكىنشى ورىندا تۇر.
كەرمانداعى تەراكت
كەرمان شابۋىلى كەرمان قالاسىندا 2024 جىلدىڭ 3 قاڭتارىندا سارسەنبى كۇنى قاسەم سۇلەيمانيدىڭ ءولتىرىلۋىنىڭ جىلدىعىنا ارنالعان سالتاناتتى شارا كەزىندە قالا زيراتىندا ورىن العان ەكى جارىلىس بولدى. كەم دەگەندە 94 ادام قازا تاپتى. 284 ادام جاراقات العان. يران ۇكىمەتى جارىلىستاردى تەراكت دەپ جاريالادى.
پەشاۆارداعى تەراكت
پەشاۆارداعى لاڭكەستىك ارەكەت – پەشاۆار قالاسىنداعى (حايبەر-پاحتۋنحۆا, پاكىستان) شيتتەر مەشىتىندە 2023 جىلعى 30 قاڭتاردا, دۇيسەنبىدە, تۇسكى ناماز كەزىندە جانكەشتى شابۋىل جاسادى. كەم دەگەندە 84 ادام قازا تاۋىپ, 200-دەن استامى جاراقات الدى.
