«ادامدار جيىركەنىشتى دۇنيەلەر جازادى»: الماتىدا بيىكتەن قۇلاپ, قازا تاپقان وقۋشىنىڭ اكەسى ۇندەۋ جاسادى

فوتو: ەۆگەني مۇحامەدجانوۆتىڭ جەلىدەگى پاراقشاسىنان الىنعان

قازا بولعان 7-سىنىپ وقۋشىسى ايشانىڭ اكەسى ەۆگەني مۇحامەدجانوۆ الەۋمەتتىك جەلىدەگى پاراقشاسىندا قىزىنىڭ ولىمىنە قاتىستى جازبا قالدىردى, دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ.

«وسى كۇندەرى ءبىزدى شىن جۇرەكتەن قولداعان بارشا جاندارعا العىسىمدى بىلدىرەمىن. مەنىڭ كىشكەنتاي پەرىشتەمنىڭ ءجانناتتا جۇرگەنىنە ءبىر اپتا بولدى. ازىرگە بولعان وقيعانى تولىقتاي قابىلداۋدان باس تارتىپ وتىرمىن. قازىر بارلىق ويىمدى جۇمىسقا ءبولۋدى ءجون كورىپ وتىرمىن. بۇل وڭاي ەمەس… ءبىز تەرگەۋ ورگاندارىنا شىن سەنەمىز. ءبىزدىڭ جاعدايىمىز ارقىلى باسقا وقيعالاردى دا تەرەڭىرەك زەرتتەۋگە مۇمكىندىك الامىز», – دەدى مارقۇمنىڭ اكەسى.

ەۆگەني مۇحامەدجانوۆ پوليتسەيلەردىڭ جالعان اقپارات تاراتقان ادامداردى قىلمىستىق جاۋاپكەرشىلىككە تارتاتىنىنا ريزاشىلىق ءبىلدىردى.

«ادامدار قانشاما ساندىراق جانە كەيدە جيىركەنىشتى نارسەلەر جازادى. بۇقارالىق اقپارات قۇرالدارى بۇل اقپاراتتى تاراتقاندا جاعداي ودان دا ۋشىعادى. مۇنداي جاڭالىقتاردى وقۋ وتە قيىن», – دەدى بەلگىلى ەكولوگ.