«ادىلدىك كەرەك»: Lamborghini-دەن سەكىرگەن ءجاسوسپىرىمنىڭ ىسىنە قاتىستى سوت ءجۇرىپ جاتىر

Lamborghini-ءدىڭ ۇستىنەن سەكىرۋ تريۋگى قايعىلى اياقتالعان وقيعا بويىنشا سوت پروتسەسى باستالدى. 22 جاستاعى بلوگەر باتىرحان ەرجانوۆتىڭ ولىمىنە قاتىستى ءىس بويىنشا العاشقى سوت وتىرىسى ءوتتى, دەپ حابارلايدى qandastar.kz اقپاراتتىق پورتالى buzyq تەلەگرام ارناسىنا سىلتەپ.

ايىپتالۋشى — تريۋك ورىندالعان كولىكتى باسقارعان 45 جاستاعى جۇرگىزۋشى. ول قىلمىستىق كودەكستىڭ «ابايسىزدا ادام ولىمىنە اكەپ سوقتىرۋ» بابىمەن جاۋاپقا تارتىلۋدا. ەگەر كىناسى دالەلدەنسە, وعان 3 جىلعا دەيىن باس بوستاندىعىن شەكتەۋ جازاسى تاعايىندالۋى مۇمكىن.

مارقۇمنىڭ تۋىستارى ايىپتالۋشىدان 220 ميلليون تەڭگە كولەمىندە مورالدىق جانە ماتەريالدىق وتەماقى تالاپ ەتۋدە. سونىمەن قاتار, ولار Lamborghini كولىگىنىڭ يەسى بەيبىت الىبەكوۆتى دە جاۋاپكەرشىلىككە تارتۋدى سۇراعان. الايدا سوت بۇل تالاپتى قاراۋسىز قالدىردى. قازىر سوت پروتسەسى جالعاسىپ جاتىر.

ەسكە سالساق, وتكەن جىلدىڭ كۇزىدە الماتى ماڭىنداعى «سوكول» اۆتودرومىندا باتىرحان ەرجانوۆ تريۋك جاساۋ كەزىندە اۋىر جاراقات الىپ, كەيىن اۋرۋحانادا كوز جۇمعان بولاتىن.