«Ádildik jáne О́rkendeý» Qory sý tasqynynan zardap shekkenderge kómek kórsetý boıynsha sharalar keshenin iske asyrýdy bastady

Sý tasqynynan zardap shekken óńirlerdegi qor ókilderi jergilikti jaǵdaıdy jáne apatqa qarsy kúrestiń alǵashqy kúnderindegi tájirıbeni eskere otyryp, tótenshe jaǵdaı rejımi jarııalanǵan oblystarǵa kómek kórsetý boıynsha sharalar keshenin usyndy.

Búgin shtabtyń birinshi otyrysy ótti. Jıynda zardap shekkenderge kómek kórsetýdiń birinshi kezektegi sharalarymen qatar, jaqyn arada úlken sý ketken kezde qoǵamdyq belsendiler óz jumysyn shoǵyrlandyratyn sharalar barysy talqylandy.

El Prezıdentiniń tapsyrmasy boıynsha Úkimet pen jergilikti atqarýshy organdar sý tasqynynyń saldaryn azaıtýǵa kúsh saldy. Qordyń barlyq ókildigi memlekettik organdar, volonterlik uıymdar, azamattyq belsendilermen birlesip jumys isteı otyryp, eldegi sý tasqyny jaǵdaıy nasharlaǵan kezden bastap tilsiz jaýǵa qarsy is-qımyl jáne olardyń saldaryn barynsha azaıtý jónindegi jumysqa belsendi qatysyp jatyr.

Shtab otyrysyna beıne-konferenııa baılanys rejıminde Qordyń barlyq 20 óńirlik ókildiginiń basshylary qatysty. Tabıǵı apattyń alǵashqy kúnderinde tótenshe jaǵdaı jarııalanǵan oblystardaǵy ókildik jetekshileri týyndaǵan ahýalǵa qatysty jedel áreket etkeni atap ótildi: olar áleýmettik jelilerde apat aýdandaryndaǵy turǵyndarǵa kómek kórsetý úshin qajetti zattardy jınaý týraly jarııalady, adamdardy bógetter men bekinister salýǵa jumyldyrdy, eriktilerdiń tamaqtanýyn uıymdastyrdy. QQ-nyń barlyq qyzmetkeri zardap shekken óńirlerden kelgen qazaqstandyqtarǵa bir kúndik jalaqylaryn aýdardy.

Shtab otyrysyna qatysýshylar buǵan deıin ýaqytyly atqarylǵan is – qımyldardyń mańyzyn erekshe atap ótip, sý ketken ýchaskelerdi tazartý, úıler men ınfraqurylymdy qalpyna keltirý jónindegi sharalardyń ekinshi kezeńin iske asyrý qajettigine nazar aýdardy. Osyǵan baılanysty Qostanaı ókildiginiń basshysy Amandyq Ámirhamzın belsendilerge turǵyndarmen kezdesýler ótkizýdi, naqty zalaldy baǵalaý úshin aýdandar men aýyldyq pýnkterge baryp, olardyń qandaı kómekke muqtaj ekenin bilýdi usyndy.

Qordyń Batys Qazaqstan ókildiginiń basshysy Asylanbek Gýbashev erikti jasaqtardyń jumysyn uıymdastyrýdy usyndy: «Qazirgi jumys kólemi orasan zor. Bizge eriktiler kerek. Sý tasqyny saldaryn joıý jumystarymen aınalysatyn er adamdar tapshy. Sonymen qatar beı-jaı qarap otyrýdan aýlaq bolý kerek», — dedi belsendi.

Áriptesin Almatydan kelgen Mıras Baıseıitov qoldady.

«Biz zardap shekken ǵımarattardy qalpyna keltirý jáne jańa úıler salý úshin erikti qurylys jasaqtaryn qurý bastamasyn qolǵa alýymyz», — dedi ol áriptesterine.

Sondaı-aq qoǵam qaıratkeri sý tasqyny saldaryn joıý qyzmetine demeýshilerdi de tartý qajet dep sanaıdy. Uıymdar tarapynan tehnıka, qural-jabdyq jáne bilikti mamandardy jumyldyrý kerek bolyp tur.

Usynystardy talqylaý barysynda Qordyń elordalyq ókildiginiń basshysy Lázzat Ahatova zardap shekkenderge dál osy ýaqytta ózekti bolyp turǵan zańgerlik keńes berý máselesin qozǵady.

«Aýyl turǵyndary úıleriniń qujattaryn joǵaltyp nemese ǵımarattar ýaqytyly zańdastyrylmaǵan, bireýdiń maly esepke alynbaǵan jaǵdaı týyndaýy múmkin. Bul materıaldyq zalaldyń mólsherin esepteý kezinde úlken problema bolady jáne munda óńir turǵyndaryna bilikti quqyqtyq kómek qajet bolady», — dedi zańger L.Ahatova.

Sonymen qatar qoǵam belsendileri sý tasqynynan zardap shekken otbasylardan shyqqan mektep jasyndaǵy balalar úshin jazǵy demalysty uıymdastyrý bastamasyn qozǵady.

Qordyń Jetisý oblystyq ókildiginiń basshysy Álııa Ahmedıeva bylaı dedi: «Oblysta balalar úshin tabıǵaty baı, tamasha demalys oryndary bar. Biz jergilikti atqarýshy organdarǵa da, Oqý-aǵartý mınıstrligine de sý basý aımaǵyndaǵy balalardyń jazǵy demalysyn uıymdastyrý boıynsha naqty usynystar joldaımyz».

Túrkistan oblysyndaǵy ókildik zardap shekken óńirlerdegi úılerdi qalpyna keltirip, qaıta salý úshin ońtústik aımaqtardan erikti otrıadtar jiberýdi uıymdastyrýdy óz qolyna alýǵa daıyn. О́kildik basshysy Ádemaý Tolysbaevanyń aıtýynsha, qazir bul másele Qordyń Jambyl oblysyndaǵy ókildigimen birlesip pysyqtalýda.

Aqtóbe oblysyndaǵy QQ ókildiginiń basshysy Aleksandr Mandrykın alǵashqy kúnnen bastap qutqarý jumystaryna, eriktiler otrıadtaryn jumyldyrýǵa qatysyp, úıi tolyǵymen sý basqan Alǵalıevter otbasyna Qor atynan qurylys materıaldaryn satyp alýǵa kómek kórsetkeni týraly baıandady. «Sý tasqynynan alǵan sabaqty muqııat zerdeleý kerek, tájirıbeli mamandardy tarta otyryp, sý jınaý oryndaryn, sýdyń júrý joldaryn, nyǵaıtý júıelerin tekserý qajet»,- dedi A.Mandrykın.

Jıyndy qorytyndylaı kele, shtab músheleri shuǵyl kómekten bastap qalpyna keltirý jumystarynyń barysyn uıymdastyrýǵa deıingi barlyq kezeńdegi is – qımyldardy naqty úılestirý qajettigin atap ótti.

«Qazir barlyq taraptyń, jergilikti atqarýshy organdardyń, qoǵamdyq volonterlik uıymdardyń kúsh-jigerin shoǵyrlandyrý qajet. Osy kúrdeli kezeńdegi azamattyq turǵyda belsendilik tanytý ózegi erekshe», — dep qorytyndylady dırektor Qýanysh Jarlyqas.

Aıta keterligi, sý tasqyny kezinde «Ádildik jáne О́rkendeý» Qorynyń barlyq 7 qoǵamdyq qabyldaýy apatqa baılanysty qıyn jaǵdaıǵa tap bolǵan turǵyndarǵa gýmanıtarlyq júkterdi jınaý jáne jetkizý, sondaı-aq eriktilerdi úılestirý mindetterin atqaryp jatyr.