«ادىلدىك جانە وركەندەۋ» قورى جوسىقسىز جۇمىس بەرۋشىلەردىڭ ءتىزىمىن جاريا ەتپەك

فوتو: اشىق دەرەككوز

«ادىلدىك جانە وركەندەۋ» قوعامدىق قورى ءوزىنىڭ جاڭا باستاماسىن جاريالادى, دەپ جازادى qandastar.kz

قور جوسىقسىز جۇمىس بەرۋشىلەر ءتىزىمىن شىعارماق. رەەستردىڭ ەرەجەسى قوردىڭ adildik.org.kz سايتىنا جۇكتەلدى.

جۇمىسشىنىڭ ەڭبەك كودەكسىنىڭ 22-بابىندا قاراستىرىلعان قۇقىعىن بۇزعان كەز كەلگەن جۇمىس بەرۋشى رەەسترگە ەنگىزىلۋى مۇمكىن.  جالاقىنىڭ كەشىكتىرىلۋى, قاۋىپسىزدىك تەحنيكاسىن ساقتاماۋ, جۇمىس توقتاپ تۇرعانى ءۇشىن اقى تولەۋدەن باس تارتۋ, تولەنەتىن ەڭبەك دەمالىسىن بەرمەۋ, جۇمىستان زاڭسىز شىعارۋ سىندى جاعدايلار رەەسترگە ەنگىزۋگە سەبەپ بولا الادى. بۇل تۇستا جۇمىس بەرۋشى مەن جۇمىسشى اراسىندا ەڭبەك شارتىنىڭ بولۋى مىندەتتى ەمەس. قولىندا ەڭبەك شارتى بولماسا دا, جۇمىسشىنىڭ ەڭبەك كودەكسىندە قاراستىرىلعان قۇقىقتارى بار.

ەڭبەك قۇقىعىنىڭ بۇزىلۋى جايلى اقپاراتتى جۇمىسشى, ۇجىم, باق, بيلىك ورگاندارىنىڭ وكىلدەرى, كاسىپوداقتار, ۇكىمەتتىك ەمەس ۇيىمدار جانە وقيعا كۋاگەرى دە ۇسىنا الادى. بۇل ءۇشىن قور سايتىندا ارنايى فورمانى  تولتىرۋ كەرەك.

رەەستردە زاڭدى تۇلعانىڭ اتاۋى, مەكەنجايى, سالاسى, قۇقىقبۇزۋشىلىق ءتۇرى مەن سانى جانە ت.ب. دەرەكتەر بولادى.

جوسىقسىز جۇمىس بەرۋشى رەەسترىنىڭ ەرەجەسىندە ۇسىنىلعان مالىمەتتەردىڭ  دايەكتىلىگى قاتاڭ باقىلانادى. ءوتىنىش بەرۋشى ەڭبەك قاتىناسى مەن قۇقىقبۇزۋشىلىق فاكتىسىن راستايتىن قۇجاتتاردى ۇسىنۋعا ءتيىس (ماسەلەن, حابارلامالار  سكرينشوتى, ەڭبەك شارتىنىڭ كوشىرمەسى…). ەگەر جۇمىس بەرۋشىنىڭ ارەكەتىنە قاتىستى ەڭبەك ۇجىمىنان شاعىم تۇسسە, جۇمىسشىلار قول قويعان پاراقتى ۇسىنۋ جەتكىلىكتى.

قور اقپاراتتى اشىق دەرەككوزدەردەن تەكسەرە الادى. قاجەتتىلىك تۋىنداعان جاعدايدا رەسمي سۇراۋ جىبەرەدى. الايدا دەرەكتەردىڭ راستىعى ءۇشىن جاۋاپكەرشىلىك ءوتىنىش بەرۋشىگە جۇكتەلەدى. شىندىققا جاناسپايتىن شاعىمداردىڭ الدىن الۋ ءۇشىن ءوتىنىش بەرۋشىنى جاۋاپكەرشىلىك جايلى ەسكەرتۋدىڭ بىرنەشە كەزەڭى قاراستىرىلعان.

رەەسترگە ەنگەن جۇمىس بەرۋشىلەر ۋاجبەن كەلىسپەسە, اقپاراتتى جوققا شىعاراتىن دالەلدەردى ۇسىنا الادى. ولار راستالسا, تىزىمنەن شىعارىلادى. بىراق قۇقىقبۇزۋشىلىق قايتالانسا, بۇل جۇمىس بەرۋشىنى رەەستردەن الىپ تاستاۋ ۋاقىتى سوزىلادى.

قور ءوتىنىش بەرۋشىلەردىڭ جەكە دەرەكتەرىن جاريالامايدى. رەەستر قوردىڭ adildik.org.kz سايتىندا جاريالانادى. كەز كەلگەن ادام ونىڭ مازمۇنىمەن تانىسا الادى. ونلاين رەجيمىندە تولىقتىرىلىپ وتىرادى.

وسىلايشا اقپاراتتى ءبىر جەردە جيناقتاۋ قازاقستاندىقتاردى جوسىقسىز جۇمىس بەرۋشىمەن ەڭبەك قاتىناسىنان قورعايدى.

«بۇل رەەستردىڭ جۇزەگە اسىرىلۋى ەڭبەك قۇقىعى بۇزىلعان جۇمىسشىلار مەن وسى ماسەلەگە بەيجاي قارامايتىن قازاقستاندىقتاردىڭ بەلسەندىلىگىنە بايلانىستى. جۇمىس بەرۋشى الداپ كەتسە نەمەسە وسىنداي جاعدايعا كۋا بولساڭىز, بىزگە حابارلاۋعا شاقىرامىز. رەەسترگە قوسساق, كومپانيا اتاۋى مەن جەتەكشىلەرىن بارشا ەل بىلەتىن بولادى!

رەەستر – جاي عانا ءتىزىم ەمەس. جۇمىسشى قۇقىعىن قورعاۋ مۇمكىندىگى. ءبىزدىڭ باستامامىز ءار ادامنىڭ ەڭبەگى باعالاناتىن قوعام قۇرۋ جولىنداعى قادام بولارىنا سەنەمىز», – دەدى ءباسپاسوز ءماسليحاتىندا قور ديرەكتورى دانا رىسمۇحامەدوۆا.

رەەستردى ىسكە قوسۋ قوعامدىق باقىلاۋدى دامىتىپ, قۇقىقتىق مادەنيەتتى نىعايتۋعا جاعداي جاسايدى.

قور بارشا جۇمىسشىنى, قوعامدىق ۇيىم وكىلدەرى مەن ازاماتتاردى ەڭبەك ادامىنىڭ قۇقىعىن قورعاپ, الەۋمەتتىك ادىلدىكتى نىعايتۋدى كوزدەيتىن باستامانى بەلسەندى قولداۋعا شاقىرادى.

جوسىقسىز جۇمىس بەرۋشىلەردىڭ العاشقى رەەسترى 2025 جىلدىڭ باسىندا جاريالانادى.