«Ádildik jáne órkendeý» qory josyqsyz jumys berýshilerdiń tizimin jarııa etpek

Foto: ashyq derekkóz

«Ádildik jáne órkendeý» qoǵamdyq qory óziniń jańa bastamasyn jarııalady, dep jazady qandastar.kz

Qor josyqsyz jumys berýshiler tizimin shyǵarmaq. Reestrdiń erejesi Qordyń adildik.org.kz saıtyna júkteldi.

Jumysshynyń Eńbek kodeksiniń 22-babynda qarastyrylǵan quqyǵyn buzǵan kez kelgen jumys berýshi reestrge engizilýi múmkin.  Jalaqynyń keshiktirilýi, qaýipsizdik tehnıkasyn saqtamaý, jumys toqtap turǵany úshin aqy tóleýden bas tartý, tólenetin eńbek demalysyn bermeý, jumystan zańsyz shyǵarý syndy jaǵdaılar reestrge engizýge sebep bola alady. Bul tusta jumys berýshi men jumysshy arasynda eńbek shartynyń bolýy mindetti emes. Qolynda eńbek sharty bolmasa da, jumysshynyń Eńbek kodeksinde qarastyrylǵan quqyqtary bar.

Eńbek quqyǵynyń buzylýy jaıly aqparatty jumysshy, ujym, BAQ, bılik organdarynyń ókilderi, kásipodaqtar, úkimettik emes uıymdar jáne oqıǵa kýágeri de usyna alady. Bul úshin Qor saıtynda arnaıy formany  toltyrý kerek.

Reestrde zańdy tulǵanyń ataýy, mekenjaıy, salasy, quqyqbuzýshylyq túri men sany jáne t.b. derekter bolady.

Josyqsyz jumys berýshi reestriniń erejesinde usynylǵan málimetterdiń  dáıektiligi qatań baqylanady. О́tinish berýshi eńbek qatynasy men quqyqbuzýshylyq faktisin rastaıtyn qujattardy usynýǵa tıis (máselen, habarlamalar  skrınshoty, eńbek shartynyń kóshirmesi…). Eger jumys berýshiniń áreketine qatysty eńbek ujymynan shaǵym tússe, jumysshylar qol qoıǵan paraqty usyný jetkilikti.

Qor aqparatty ashyq derekkózderden teksere alady. Qajettilik týyndaǵan jaǵdaıda resmı suraý jiberedi. Alaıda derekterdiń rastyǵy úshin jaýapkershilik ótinish berýshige júkteledi. Shyndyqqa janaspaıtyn shaǵymdardyń aldyn alý úshin ótinish berýshini jaýapkershilik jaıly eskertýdiń birneshe kezeńi qarastyrylǵan.

Reestrge engen jumys berýshiler ýájben kelispese, aqparatty joqqa shyǵaratyn dálelderdi usyna alady. Olar rastalsa, tizimnen shyǵarylady. Biraq quqyqbuzýshylyq qaıtalansa, bul jumys berýshini reestrden alyp tastaý ýaqyty sozylady.

Qor ótinish berýshilerdiń jeke derekterin jarııalamaıdy. Reestr qordyń adildik.org.kz saıtynda jarııalanady. Kez kelgen adam onyń mazmunymen tanysa alady. Onlaın rejıminde tolyqtyrylyp otyrady.

Osylaısha aqparatty bir jerde jınaqtaý qazaqstandyqtardy josyqsyz jumys berýshimen eńbek qatynasynan qorǵaıdy.

«Bul reestrdiń júzege asyrylýy eńbek quqyǵy buzylǵan jumysshylar men osy máselege beıjaı qaramaıtyn qazaqstandyqtardyń belsendiligine baılanysty. Jumys berýshi aldap ketse nemese osyndaı jaǵdaıǵa kýá bolsańyz, bizge habarlaýǵa shaqyramyz. Reestrge qossaq, kompanııa ataýy men jetekshilerin barsha el biletin bolady!

Reestr – jaı ǵana tizim emes. Jumysshy quqyǵyn qorǵaý múmkindigi. Bizdiń bastamamyz ár adamnyń eńbegi baǵalanatyn qoǵam qurý jolyndaǵy qadam bolaryna senemiz», – dedi baspasóz máslıhatynda Qor dırektory Dana Rysmuhamedova.

Reestrdi iske qosý qoǵamdyq baqylaýdy damytyp, quqyqtyq mádenıetti nyǵaıtýǵa jaǵdaı jasaıdy.

Qor barsha jumysshyny, qoǵamdyq uıym ókilderi men azamattardy eńbek adamynyń quqyǵyn qorǵap, áleýmettik ádildikti nyǵaıtýdy kózdeıtin bastamany belsendi qoldaýǵa shaqyrady.

Josyqsyz jumys berýshilerdiń alǵashqy reestri 2025 jyldyń basynda jarııalanady.