جاڭالىقتار
ادىلەت مينيسترلىگى قازاقستاندىق ارتىستەردىڭ مۋزىكاسى Instagram جەلىسىنە قايتا شىققانىن راستادى
فوتو: ru.epicstars.com
ادىلەت مينيسترلىگى قازاقستاندىق اۆتورلار مەن ورىنداۋشىلاردىڭ كەيبىر مۋزىكالىق تۋىندىلارى قازىر Instagram الەۋمەتتىك جەلىسىندە قايتا پايدا بولعانىن مالىمدەدى, دەپ جازدى qandastar.kz
بۇل تۋرالى Stan.kz اقپارات اگەنتتىگى Kazinform پورتالىنا سىلتەمە جاساپ حابارلايدى.
ۆەدومستۆونىڭ مالىمەتىنشە, Instagram-داعى مۋزىكالىق كونتەنتكە قولجەتىمدىلىك Meta پلاتفورماسىنىڭ ىشكى ساياساتى مەن قۇقىق يەلەرىمەن جاسالعان كەلىسىمدەرگە بايلانىستى كەزەڭ-كەزەڭىمەن جاڭارتىلىپ وتىرادى. ياعني Meta تەك ۇجىمدىق نەگىزدە قۇقىقتاردى باسقاراتىن ۇيىممەن عانا ەمەس, سونىمەن قاتار اۆتورلار مەن ورىنداۋشىلارمەن تىكەلەي شارت جاساسۋعا قۇقىلى.
«بۇعان بايلانىستى بۇل Meta كومپانياسىمەن تىكەلەي كەلىسىمشارت جاساسقان قۇقىق يەلەرىنىڭ شىعارمالارى دەپ ەسەپتەيمىز», – دەپ مالىمدەدى ادىلەت مينيسترلىگى.
ەسكە سالايىق, بىلتىرعى كۇزدە Meta-عا تيەسىلى Instagram جەلىسىنەن قازاقستاندىق مۋزىكالىق شىعارمالاردىڭ باسىم بولىگى جوعالىپ كەتكەن ەدى. قازاقستاندىق ورىنداۋشىلاردىڭ اۆتورلىق قۇقىقتارىن ەل ىشىندە جانە شەتەلدە قورعاۋمەن اينالىساتىن قازاقستان اۆتورلار قوعامى Meta Platforms كومپانياسى ۇسىنعان گونورار سوماسىنىڭ تىم تومەن ەكەنىن ايتىپ, بۇل ۇسىنىستان باس تارتقانىن جانە الدىڭعى كەلىسىمنىڭ مەرزىمى اياقتالعانىن مالىمدەگەن ەدى.
تانىمال ورىنداۋشىلار Dequine مەن Akim قازاقستان اۆتورلار قوعامىن مۋزىكانى پايدالانۋ قۇقىقتارىن اۆتورلاردىڭ كەلىسىمىنسىز ساتۋ جانە «رويالتي» تولەمەۋ ماسەلەسى بويىنشا ايىپتادى. Dequine ءوز اندەرىنىڭ Air Astana بورتتارىندا كەلىسىمسىز پايدالانىلعانىن ايتىپ, قازاقستان اۆتورلار قوعامىنان ەشقانداي تولەم الماعانىن جەتكىزدى.
قازاقستان اۆتورلار قوعامى قۇپيالىلىق كەلىسىمىنە سايكەس, ناقتى سىياقى مولشەرىن جاريالامادى. الايدا ۇسىنىلعان سوما Meta كومپانياسىنىڭ ەۋروپا مەن امەريكاداعى قۇقىق يەلەرىنە تولەيتىن اقىسىنان الدەقايدا تومەن ەكەنى حابارلانعان.
جۋرناليست ءادىل بالتاباەۆ الەۋمەتتىك جەلىلەردە قازاقستان اۆتورلار قوعامى ارىپتەستىك ورناتقان كەيبىر ارتىستەردىڭ رويالتي تولەمدەرىنىڭ بولماۋىنا شاعىمدانعانىن جازعان. جۋرناليستەردىڭ ەسەپتىلىكتىڭ اشىقتىعىنا قاتىستى سۇراعىنا قازاقستان اۆتورلار قوعامى وكىلدەرى «كەز كەلگەن اۆتور سايت ارقىلى نەمەسە بىزدەن ەسەپتى سۇراتا الادى» دەپ جاۋاپ بەرگەن. سونداي-اق قازاقستان اۆتورلار قوعامى سىياقى مولشەرىن قۇقىق يەلەرىمەن الدىن الا تالقىلاۋسىز كوتەرۋ تۋرالى شەشىمى دە سىنعا ۇشىراعان. بۇل شەشىم اۆتورلىق كەڭەستىڭ شەشىمىمەن قابىلدانعان.
