Ádilet mınıstrligi qazaqstandyq ártisterdiń mýzykasy Instagram jelisine qaıta shyqqanyn rastady

Foto: ru.epicstars.com

Ádilet mınıstrligi qazaqstandyq avtorlar men oryndaýshylardyń keıbir mýzykalyq týyndylary qazir Instagram áleýmettik jelisinde qaıta paıda bolǵanyn málimdedi, dep jazdy qandastar.kz

Bul týraly Stan.kz aqparat agenttigi Kazinform portalyna silteme jasap habarlaıdy.

Vedomstvonyń málimetinshe, Instagram-daǵy mýzykalyq kontentke qoljetimdilik Meta platformasynyń ishki saıasaty men quqyq ıelerimen jasalǵan kelisimderge baılanysty kezeń-kezeńimen jańartylyp otyrady. Iaǵnı Meta tek ujymdyq negizde quqyqtardy basqaratyn uıymmen ǵana emes, sonymen qatar avtorlar men oryndaýshylarmen tikeleı shart jasasýǵa quqyly.

«Buǵan baılanysty bul Meta kompanııasymen tikeleı kelisimshart jasasqan quqyq ıeleriniń shyǵarmalary dep esepteımiz», – dep málimdedi Ádilet mınıstrligi.

Eske salaıyq, byltyrǵy kúzde Meta-ǵa tıesili Instagram jelisinen qazaqstandyq mýzykalyq shyǵarmalardyń basym bóligi joǵalyp ketken edi. Qazaqstandyq oryndaýshylardyń avtorlyq quqyqtaryn el ishinde jáne shetelde qorǵaýmen aınalysatyn Qazaqstan avtorlar qoǵamy Meta Platforms kompanııasy usynǵan gonorar somasynyń tym tómen ekenin aıtyp, bul usynystan bas tartqanyn jáne aldyńǵy kelisimniń merzimi aıaqtalǵanyn málimdegen edi.

Tanymal oryndaýshylar Dequine men Akim Qazaqstan avtorlar qoǵamyn mýzykany paıdalaný quqyqtaryn avtorlardyń kelisiminsiz satý jáne «roıaltı» tólemeý máselesi boıynsha aıyptady. Dequine óz ánderiniń Air Astana borttarynda kelisimsiz paıdalanylǵanyn aıtyp, Qazaqstan avtorlar qoǵamynan eshqandaı tólem almaǵanyn jetkizdi.

Qazaqstan avtorlar qoǵamy qupııalylyq kelisimine sáıkes, naqty syıaqy mólsherin jarııalamady. Alaıda usynylǵan soma Meta kompanııasynyń Eýropa men Amerıkadaǵy quqyq ıelerine tóleıtin aqysynan áldeqaıda tómen ekeni habarlanǵan.

Jýrnalıst Ádil Baltabaev áleýmettik jelilerde Qazaqstan avtorlar qoǵamy áriptestik ornatqan keıbir ártisterdiń roıaltı tólemderiniń bolmaýyna shaǵymdanǵanyn jazǵan. Jýrnalısterdiń eseptiliktiń ashyqtyǵyna qatysty suraǵyna Qazaqstan avtorlar qoǵamy ókilderi «Kez kelgen avtor saıt arqyly nemese bizden esepti surata alady» dep jaýap bergen. Sondaı-aq Qazaqstan avtorlar qoǵamy syıaqy mólsherin quqyq ıelerimen aldyn ala talqylaýsyz kóterý týraly sheshimi de synǵa ushyraǵan. Bul sheshim avtorlyq keńestiń sheshimimen qabyldanǵan.