الەم جاڭالىقتارى
ادىلەت مينيسترلىگى «ستاتي ءىسى» جابىلعانىن ايتتى
فوتو: ehonews.kz
“ستاتي ىسىنە” رەسمي تۇردە نۇكتە قويىلدى, دەپ جازدى qandastar.kz
ادىلەت مينيسترلىگى داۋدىڭ تۇپكىلىكتى شەشىلگەنىن حابارلادى. 2024 جىلدىڭ شىلدەسىندە ۇكىمەت, ۇلتتىق بانكى جانە ستاتي تاراپتارى مۇناي مەن گازعا قاتىستى كيكىلجىڭدى شەشەتىن زاڭدىق كۇشى بار كەلىسىم جاساستى. سونىڭ نەگىزىندە بارلىق سوت پروتسەستەرى توقتادى. كەلىسىم قۇپيا بولىپ قالماق.
قازاقستان مولدوۆالىق كاسىپكەرمەن 13 جىل بويى سوتتاستى. سول ءۇشىن بيۋدجەتتەن قىرۋار قارجى ءبولىندى. بەيرەسمي مالىمەت بويىنشا, قازاقستان بيلىگى جىل سايىن شەتەلدىك ادۆوكاتتاردى جالداۋعا $60 ملن جۇمساپ وتىرعان.
مولدوۆالىق كاسىپكەر قازاقستان بيلىگىن وزدەرىنىڭ مەنشىگىنە رەيدەرلىك جاسادى دەپ ايىپتاپ, 2010 جىلى حالىقارالىق اربيتراجعا جۇگىنگەن ەدى. شاعىمدار نيدەرلاندى, بەلگيا, ليۋكسەمبۋرگ, شۆەتسيا, ۇلىبريتانيا جانە اقش سوتتارىندا قارالدى. سونىڭ كەسىرىنەن ءبىر كەزدەرى ۇلتتىق قور بۇعاتتالىپ, سامۇرىق-قازىنا اكتيۆتەرىنە شەكتەۋ قويىلعان.
