Advokat “Dıkıı Armannyń” ákesi prokýror ekenin aıtty

Foto: jeke qorynan

Advokat Lázzát Ahatova «Dıkıı Arman» esimimen tanymal Arman Djýmageldıev týraly el bilmeıtin aqparatpen bólisti. Bul týraly advokat Instagram jelisinde jazdy, dep habarlaıdy qandastar.kz aqparat portaly.

«Dıkıı Armannyń sottaǵy sońǵy sózi dep, “Men túrmede máńgi otyrmaımyn, sender máńgi sýdıa men prokýror bolmaısyńdar. Adam bop qalaıyq” degen onsha qıyspaıtyn, úılespeıtin sózderdi jelige salyp jatyr eken, bir kisiler. Negizi bizge sondaı popýlızmge jaqyndaý nárseler qyzyq qoı. Qylmys áleminiń serkesi, “Dıkıı Arman” degen atpen tanymal Jumageldıev Armannyń ákesi jaıly maǵlumat estip pe edińizder? Jalǵyzbasty anasy tárbıelegenin biletinder bar bolar. Al ákesi jaıly málimet aıtylmaıdy. Jaqynda áriptesterimnen ákesiniń kim ekenin estip, aýzym ashyldy. Nekesiz týǵan bala eken, bul jigit. Kimniń uly deısizder me? Prokýrordyń… Iá, ákesi Ońtústik óńirine belgili prokýratýra qyzmetkeri eken. Talaı kórgen adamym ekenin bilgende, reakııamnyń qandaı bolǵanyn aıtpaı-aq qoıaıyn…», — dedi ol.

Sondaı-aq zańger ákeniń bala tárbıesindegi rólin de aıta ketti.

«Buny qyzyq úshin jazyp otyrǵan joqpyn. Bizdiń qoǵamda ákeniń, erlerdiń balanyń ómirine, taǵdyryna, tárbıesine jaýapkershiligi óte az ekenin, bar jaýapkershilik te, taýqymet te álsiz áıeldiń moınyna artylatynyn oılanyp kettim… Ákeniń bári birdeı emes, nebir azamattar barshylyq qoı, eshqandaı balasyn ógeısitpeı, bárine jaýapkershilikpen qaraıtyn. Biraq… Tanymal, laýazymdy adamdardyń arasynda da nekesiz balalaryn taǵdyr tálkegine shimirikpeı tastap, jaıbaraqat ómir súre beretinderdiń kóptigi oılandyrmaı qoımaıdy eken… Ol jezókshe bop, árkimniń qolyndaǵy qýyrshaqqa aınala ma, joq, atyshýly qylmysker bop kete me, báribir. Olardyń júregindegi jara, muń, ákege degen máńgilik saǵynysh, ala almaǵan mahabbat, ókpe-nala — osyndaı buralań joldarǵa túsýlerine sebep boldy ma eken dep te oılap, qýatyn boppyn, sońǵy kezde. Bir kúni psıholog bop ketpesem boldy», — dep túıindedi zańger.