افينادا قازاق كينوسىنىڭ كۇندەرى ءوتتى

فوتو: pexels

گرەكيا استاناسى افينا قالاسىندا قازاق كينوسىنىڭ كۇندەرى ءوتتى,  دەپ حابارلايدى Qandastar.kz سايتى مينيسترلىكتىڭ ءباسپاسوز قىزمەتىنە سىلتەمە جاساپ.

26-28 مامىر ارالىعىندا وتكەن ءىس-شارا قازاقستان رەسپۋبليكاسى مادەنيەت جانە اقپارات مينيسترلىگى مەن «قازاقفيلم» ۇلتتىق كينوستۋدياسىنىڭ قولداۋىمەن ۇيىمداستىرىلدى. 

فەستيۆال اياسىندا قازاقستان تاريحى, مادەنيەتى مەن حالىق باتىرلارى جايلى باياندايتىن كلاسسيكالىق جانە زاماناۋي فيلمدەر گرەك كورەرمەنىنە ۇسىنىلدى. كينو كۇندەرى ساق پاتشايىمى توميريس تۋرالى تاريحي دراما – «توميريس» ءفيلمىنىڭ كورسەتىلىمىمەن اشىلدى. ەركىندىك پەن باتىلدىقتىڭ سيمۆولىنا اينالعان ايەل تۇلعاسى تۋرالى بۇل تۋىندى كورەرمەندەردىڭ ەرەكشە قىزىعۋشىلىعىن تۋدىردى. وسىعان بايلانىستى گرەكيادا ءفيلمدى پروكاتقا شىعارۋ جونىندە كەلىسسوزدەر باستالدى.

سونىمەن قاتار, كورەرمەندەر اتى اڭىزعا اينالعان «دوس-مۇقاسان» ءانسامبلى تۋرالى ءفيلمدى جانە «قازاقفيلم» قالپىنا كەلتىرگەن وتاندىق كينو كلاسسيكاسى – «مەنىڭ اتىم قوجا» تۋىندىسىن تاماشالادى.

كورسەتىلىمدەردەن كەيىن قازاقستاندىق اكتەرلەر مەن رەجيسسەرلەر, سونداي-اق گرەك كينويندۋسترياسىنىڭ وكىلدەرى قاتىسقان شىعارماشىلىق كەزدەسۋلەر مەن پىكىرتالاستار ءوتتى.

فەستيۆالگە قاتىسۋشىلاردىڭ پىكىرىنشە, مۇنداي مادەني الماسۋ شارالارى – قازاقستان مەن گرەكيا حالىقتارى اراسىنداعى ءوزارا تۇسىنىستىك پەن ىنتىماقتاستىقتى نىعايتۋدىڭ ءتيىمدى جولى.

وسىلايشا, افينادا وتكەن قازاق كينوسىنىڭ كۇندەرى گرەك كورەرمەنىنىڭ زور ىقىلاسىنا بولەنىپ, ەكى ەل اراسىنداعى مادەني بايلانىستى تەرەڭدەتە ءتۇستى.