«Qorlaý – mádenıetimizge jat.»: Ánshi Erlan Rysqalı Álııa Áshim týraly oıyn aıtty

Dástúrli ánshi Erlan Rysqalı bloger Álııa Áshimdi qoldap, ony qatań synamaýǵa shaqyrdy, dep habarlaıdy Qandastar.kz.

Bul týraly ol Instagram-daǵy paraqshasynda jazdy.

«Áleýmettik jelide Álııa Áshimniń “Abaı men Dildá netken” degen vıdeosy qyzý talqyǵa túsip jatyr eken. Iá, vıdeodaǵy oı-paıym sál tosyndaý. Biraq soǵan bola Álııanyń buǵan deıingi aǵartýshylyq eńbegin, ult úshin jasap júrgen izdenisin, zertteýlerin joqqa shyǵarý – ádiletsizdik.

Álııa – ultqa jany ashıtyn, qazaq mádenıeti men tarıhyna tereń boılaǵan, san túrli tyń taqyryptardy qozǵap júrgen talantty, izdenimpaz jýrnalıst. Onyń jarııalaǵan kontentteri arqyly qanshama adam tyń málimet alyp, kókirek kózin ashyp keledi.

Syn aıtýǵa bolady. Biraq qarǵaý, jek kórý, qorlaý – bul bizdiń mádenıetimizge jat. Erkin pikir bildirgen adamnyń únin óshirý – ózimizdiń órisimizdi taryltý. Kelisip jatsaq – qup! Kelispesek – pikirmen jaýap bereıik! Biraq adamdy taptaý, jeke basyn qorlaý – jol emes.

Álııanyń eńbegi men nıetin joqqa shyǵarmaýymyz kerek. Ol – óz halqy úshin ter tógip júrgen azamat», — dep jazdy ánshi.