«Agressordy aqtap, zombylyqty nasıhattady»: Serik Sháripten suhbat alǵan bloger Álisher Elikbaev jurttyń yzasyn týdyrdy

Foto:vıdeo

Qazaqstandyq bloger Álisher Elikbaev akter Serik Sháripten alǵan suhbatynan keıin áleýmettik jelide synnyń astynda qaldy, dep jazdy qandastar.kz

Bul týraly Stan.kz aqparat agenttigi habarlaıdy.

Álisher Elikbaev Almatydan Astanaǵa kólikpen sapar shekken kezde akter Serik Sháripten suhbat alǵan. Aıta keteıik, buǵan deıin Shárip (kópshilikke “Shakentı” laqap atymen belgili) áleýmettik jelide burynǵy súıiktisine agressııalyq áreket kórsetkeni úshin daýǵa qalǵan edi.

Cuhbatta Shakentı sol kúni ne bolǵanyn, barlyq kontraktilerinen aıyrylǵan soń qandaı kúıde bolǵanyn aıtady.

«О́zimdi ustaı almaı, shapalaqpen urdym. Ol otyrdy da, jylaı bastady. Ekeýmiz de ábden sharshaǵan edik. Múmkin, kúshimdi ustaı almaǵan shyǵarmyn. Torda otyrǵanda, syrtqa shyǵa almaısyń… Dárethana janynda, tútinniń ishinde. Bes kún boıy sonda otyrsań — kóp nárseni túsine bastaısyń”, – deıdi ol.

Tipti óz-ózine qol jumsaǵysy kelgenin málimdedi.

«Menimen barlyq kelisimsharttar buzyldy. Men sondaı bir… siz aıtqandaı, “ýly” keıipkerge aınaldym, eshkim baılanysqysy kelmeıtin adam boldym. Shynymdy aıtsam, qatty kúızeldim. Júregim jaralandy. Qalaı ómir súremin dep oıladym. Men kınematografııaǵa 13 jylymdy arnadym ǵoı,» – deıdi akter.

Bul suhbat jeli qoldanýshylary arasynda ártúrli reakııa týǵyzdy. Threads jelisinde Elikbaevqa qatysty syn pikirler qarsha jaýdy. Oǵan jazylýdan bas tartyp jatqandar sany kóp.

“Álisher sizden kútpep edim”. “Elikbaevtan da zombylyqty nasıhattaǵany úshin bas tartaıyq”, “Nege osyndaı adamnan suhbat alady? Ony aqtap otyr ma?”, “Sizden kóńilim qaldy”, “Zorlyq-zombylyqty aqtap otyr, ne sumdyq”, – dep jazdy jeli qoldanýshylary.

Belgili bloger Naǵıma Ahmetova (Naǵımýsha) Elikbaevty “agressordyń áreketin zańdastyryp otyr” dep aıyptady.

“Qoǵamda syıly adam sanalatyn Álisher sekildi tulǵa zorlyq faktisinen keıin bir aı ótpeı agressordy suhbatqa shaqyryp, ony “qurban” retinde kórsetetin áńgime aıtyp otyrsa, ol onyń áreketin zańdastyrady. Agressordyń ımıdjin jýyp, ony “beıshara jigit” retinde qaıtadan qoǵam aldyna shyǵarýǵa kómektesedi. Bul arqyly ol óziniń kóp jyldyq eńbegimen qalyptasqan bedeline de kóleńke túsiredi. Álisher qaıyrymdylyqpen, áleýmettik jobalarmen aınalysyp, halyqtyń senimine ıe bolǵan edi”, – dep jazdy ol.

“Suhbatty kórip shyqtym. Jarııalanǵany durys boldy. Áli de oǵan “kensel” kerek pe dep kúmándanǵandar endi durys sheshim qabyldaǵanyna senimdi bola alady. Oqıǵaǵa deıin onyń kim ekenin bilmeppin, kınodaǵy oıynyn da kórmedim. Biraq suhbattan keıin akterlik qabileti joq ekenin túsindim. Bıshimbaev odan jaqsyraq oınady. Árıne, ol jerde de senbegen edi”, – dep jazdy zańger Anna Chernova.

Eske sala ketsek, buǵan deıin Álııa Býteeva esimdi boıjetken akter Shárip Seriktiń urǵanyn aıtyp bergen edi. Bul oqıǵa qoǵamda úlken rezonans týdyryp, akterge qatysty cancel culture mádenıeti bastaldy. Salem Entertainment medıakompanııasy onymen barlyq yntymaqtastyqty toqtatyp, akterdi qara tizimge engizdi.

Al sot akterdi kináli dep taýyp, 5 táýlikke qamaýǵa alý týraly sheshim shyǵardy.