جاڭالىقتار
Air Astana 5 جاسار قىزدىڭ ولىمىنەن كەيىن 5 ملن تەڭگە وتەماقى تولەيتىن بولدى
فوتو: اشىق دەرەككوز
Air Astana اۋە كومپانياسى 5 جاسار ينساف ەسىمدى قىزدىڭ اتا-اناسىنا 5 ميلليون تەڭگە وتەماقى تولەۋگە مىندەتتەلدى. بۇل جونىندە الماتى قالالىق سوتىنىڭ ءباسپاسوز قىزمەتى حابارلادى. ارىز Air Astana مەن اۋەجايعا قارسى بەرىلگەنىمەن, جاۋاپكەرشىلىك تەك اۋە كومپانياسىنا جۇكتەلدى, دەپ حابارلايدى qandastar.kz Dalanews.kz-كە سىلتەمە جاساپ.
الماتى قالاسىنىڭ تۇركسىب اۋداندىق سوتى اۋىر حالدەگى بالانى تاسىمالداۋ كەزىندە زاڭبۇزۋشىلىقتار ورىن العانىن راستادى. ءىس ماتەريالدارىنا سايكەس, الماتىعا رەيس كەلگەن سوڭ, كومادا جاتقان, وزدىگىنەن قوزعالا المايتىن قىزدى ينۆاليدتەرگە ارنالعان اربامەن تاسىمالداۋ ۇسىنىلعان, بۇل ارەكەت مەديتسينالىق تالاپتارعا ساي كەلمەگەن.
قىزدىڭ اتا-اناسى الدىن الا دارىگەرى بار جەكە رەانيموبيل شاقىرعان. الايدا اۋەجاي اكىمشىلىگى بۇل كولىكتى وتكىزۋگە رۇقسات بەرمەگەن.
ينسافتى امبۋليفت ارقىلى تاسىمالداعان — بۇل قۇرال مۇمكىندىگى شەكتەۋلى جولاۋشىلارعا ارنالعانىمەن, اۋىر حالدەگى ناۋقاستاردى تاسىمالداۋعا بەيىمدەلمەگەن.
نەيروحيرۋرگ ماماننىڭ قورىتىندىسىنا سايكەس, قىز وزدىگىنەن قوزعالا المايتىندىقتان, شەكارالىق باقىلاۋدان مەديتسينالىق ءبولىم ارقىلى ءوتۋى ءتيىس ەدى. الايدا سوت دەرەكتەرىندە كورسەتىلگەندەي, شەكارا باقىلاۋىندا ينسافتىڭ كوزىندەگى تاڭعىش كۇشتەپ شەشىلىپ, سۋرەتكە تۇسىرىلگەن. ءبىر ايدان كەيىن قىز كوز جۇمدى.
سوت بۇل جاعدايعا قاتىستى: اۆياكومپانيا مەن اۋەجاي اراسىنداعى ۇيلەستىرۋدىڭ بولماۋى, سونىڭ ىشىندە شەكارالىق جانە كەدەندىك باقىلاۋداعى نەمقۇرايدىلىق ينسافتىڭ دەنساۋلىعىنىڭ كۇرت ناشارلاۋىنا اسەر ەتتى دەگەن قورىتىندىعا كەلدى.
بۇل وقيعاعا قاتىستى «كۋرسيۆ» باسىلىمى بۇعان دەيىن ەكى تاراپتىڭ جاۋاپكەرشىلىكتى ءبىر-بىرىنە جۇكتەگەنىن جازعان بولاتىن. الماتى اۋەجايى Air Astana مەديتسينالىق جاعدايداعى جولاۋشى تۋرالى الدىن الا ەسكەرتپەدى دەسە, اۋە كومپانياسى كەرىسىنشە, ەسكەرتكەنىن, بىراق سوندا دا اربانىڭ ۇسىنىلعانىن مالىمدەگەن.
