«Air Astana اشۋ-ىزامىزعا ءتيدى»: قاراقات ءابىلدينا شىعىنعا باتقانىن ايتتى

تانىمال ءانشى قاراقات ءابىلدينا الماتىدا وتەتىن ءىس-شاراعا قاتىسا الماعانىنا اۋە كومپانياسىن كىنالادى, دەپ حابارلايدى Qandastar.kz

Stan.kz مالىمەتىنشە, ەسترادا جۇلدىزى ءۇش اي بۇرىن مادەني ءىس-شاراعا شاقىرىلىپ, بيلەت الىنىپ قويعان.

ء“وزىم داۋ-داماي قۋاتىن, ب ۇلىك ىزدەيتىن ادامداردىڭ قاتارىنان ەمەسپىن. قانشاما جىل ۇشىپ ءجۇرمىز. 2-3 ساعاتقا كەشىگۋ دەگەندەرگە تۇسىنىستىكپەن قارايمىز. بىراق كەشە قاتتى اشۋلاندىق. وسى ۋاقىتقا دەيىن كوز جۇمىپ كەلگەن ەدىك. ءبارىمىزدىڭ اشۋ-ىزامىزعا ءتيدى. كۇنى بويى وتىرعاندا مەنى تاڭعالدىرعانى, باسشىلىقتان ءبىر ادام شىعىپ, جاعدايدى تۇسىندىرگەن جوق. وتىرىك بولسا دا, “كەشىرىڭىزدەر” دەپ ىستىق شايىن ۇسىنعان جوق. ءبىز قاتىساتىن ءىس-شارانىڭ ماڭىزدى ەكەنىن, حالىقتىڭ كۇتىپ وتىرعانىن جەتكىزۋگە تىرىستىق. ءتىپتى, جەتۋدىڭ باسقا دا جولدارىن قاراستىرعان جوق. تەك ۋاقىتتى كەيىنگە شەگەرە بەردى. ەلىمىزدىڭ بەتكەۇستار اۋەكومپانياسى بولعاسىن, جولاۋشىلار تاراپىنان سەنىم بولادى. بىراق ولاردىڭ تۇتىنۋشىلارعا بەيجاي قارايتىنى قاتتى قىنجىلتتى. كەشە قاتتى قاپا بولدىم. ولار ءۇشىن رەيستەردىڭ كەشىككەنى قالىپتى جاعدايعا اينالىپ كەتكەن. ەشكىم باسىن اۋىرتىپ جۇرگەن جوق. الدىن-الا ەسكەرتۋ دەگەن جوق, 4 ساعات بۇرىن وتىرعىزىپ قويدى. اۋەجايدا 10 ساعات بويى ۇشاتىن ۋاقىتتى كۇتىپ وتىردىق. 20:40-تا ۇشاتىن ۇشاقتى 22.10-عا الماستىردى. ءىس-شارانىڭ سوڭىنا بولسا دا ۇلگەرەمىز دەگەن ءۇمىتىمىز ءسوندى دە قالدى”, – دەپ اشۋلاندى ءانشى.

ونەر يەسىنىڭ ايتۋىنشا, الماتىداعى ءىس-شارا ءۇش اي بۇرىن جوسپارلانىپ قويعان كورىنەدى. ۇيىمداستىرۋشىلار الدىن-الا گونورارلارىن دا جىبەرگەن.

“وسى جولى ۇلكەن ءىس-شارادان قالدىق. اقىسى تولەنىپ, ءۇش اي بۇرىن بيلەت العان ەدىك. ەندى ۇيىمداستىرۋشىلار بىزدەن گونوراردى قايتارۋىمىزدى تالاپ ەتىپ وتىر. بۇل جەردە ءبىزدىڭ قانداي كىنامىز بار?! شاقىرىپ جاتقان جاقتىڭ قانداي كىناسى بار?! سۇراق كوپ, جاۋاپ جوق. ءار ادام ءوز ءومىرىن جوسپارلايدى. ءبىر كومپانيانىڭ كەسىرىنەن, قانشاما ادام شىعىنعا باتتى. ءبىزدىڭ قوناقۇيىمىز دە تولەنىپ قويعان ەدى. سوندا بۇل جاعدايدا Air Astana جاۋاپقا تارتىلماي ما?! ماعان بەرگەن جاۋاپتارىن جەكە پاراقشامدا ءبولىسىپ قويدىم. جاتتاندى سوزدەرمەن جازىپ جىبەرىپتى. بىراق كەتكەن شىعىندى كىم وتەيدى?! نەگە ادامدار وسىنداي قولايسىزدىققا تاپ بولادى?! جاۋاپتارىنا قاناعاتتانىپ وتىرعان جوقپىن”, – دەدى ەسترادا جۇلدىزى.