جاڭالىقتار
Air Astana ۇشاعى باكۋدە قونۋعا ءماجبۇر بولدى
فوتو:istockphoto
تبيليسي-الماتى باعىتى بويىنشا رەيس ورىنداعان Air Astana اۋە كومپانياسىنىڭ Airbus A321 ۇشاعى گەيدار اليەۆ اتىنداعى حالىقارالىق اۋەجايعا شۇعىل تۇردە قوندى, – دەپ حابارلايدى qandastar.kz ztb.kz-كە سىلتەمە جاساپ.
Airbus A321 ۇشاعىنىڭ كاپيتانى جولاۋشىلاردىڭ ءبىرىنىڭ دەنساۋلىعى كۇرت ناشارلاعاننان كەيىن باكۋ اۋەجايىنا قونۋعا رۇقسات سۇراعان. اۋەجاي جەدەل تۇردە داعدارىس ورتالىعىن جانە بارلىق قاجەتتى قىزمەتتەردى جۇمىلدىردى.
– ۇشاق جەرگىلىكتى ۋاقىت بويىنشا ساعات 00:25-تە ءساتتى قوندى. شۇعىل مەديتسينالىق كومەك قاجەت بولعان جولاۋشىعا قونۋ ساتىندە بىردەن العاشقى مەديتسينالىق جاردەم كورسەتىلدى. ول جەدەل جاردەم قىزمەتىنە تاپسىرىلىپ, ءارى قاراي تەكسەرۋ ءۇشىن قالالىق اۋرۋحاناعا جەتكىزىلدى, – دەلىنگەن اقپاراتتا.
رەيس كەيىنگە شەگەرىلىپ, جولاۋشىلار ۋاقىتشا قوناقۇيگە ورنالاستىرىلدى. اۋەجاي قالىپتى رەجيمدە جۇمىسىن جالعاستىرۋدا.
