ايدوس سارىم: مەديتسينالىق ساقتاندىرۋ قورى دەگەن ءبىر مايشەلپەك

«زەينەتاقى قورىنداعى, قانشا تۇسكەنىن, ونىڭ قالاي ازايىپ, كوبەيگەنىن قازىر كومپيۋتەردەن تەلەفونداعى قوسىمشادان كۇندەلىكتى كورىپ وتىرامىز. امسق دەگەنىمىز ءبىر مايشەلپەك. ءبارىمىز اي سايىن اقشا اۋدارىپ جاتىرمىز. 10 جىلدا ءبىر باراتىن شىعارمىز, بەس جىلدا ءبىر باراتىن شىعارمىز. وسى جاۋاپكەرشىلىك ماسەلەسىن جەتىلدىرىپ, ءار ازاماتتىڭ قورداعى ءىزىن كورسەتۋ مۇمكىندىگى بار», – دەپ سۇرادى ول ءماجىلىستىڭ جالپى وتىرىسىندا.

پرەمەر-ءمينيستردىڭ ورىنباسارى تامارا دۇيسەنوۆا بۇل ماسەلەنى رەتتەۋ كەلەسى جىلعا قالدىرىلعانىن ايتتى.

«امسق-عا نەشە ازاماتتىڭ قاتىسىپ جاتقانى, قانشا قاراجات تولەنىپ جاتقانى تۋرالى اقپاراتتىڭ ءبارى ەڭبەك مينيسترلىگىنىڭ جۇيەسىندە تولىق كورىنىپ تۇر. قوردىڭ ينتەگراتسيالانعان جۇيەسى بولماعاندىقتان ازاماتتار وزدەرىنە قانشا قاراجات ءتۇسىپ جاتقانىن كورە المايدى. بۇل جۇمىستاردى كەلەسى جىلدىڭ اياعىنا دەيىن بىتىرەمىز. بىرىڭعاي جيناقتىق زەينەتاقى قورى سياقتى ءار ازاماتقا قانشا قاراجات ءتۇسىپ جاتقانىن تۋرالى اقپاراتتى بەرىپ وتىرادى. بيىل 49 اقپاراتتىق جۇيەنىڭ 22-ءسىن بيىل ينتەگراتسيالاپ بىتىرەمىز. ال قالعانىن كەلەسى جىلعا قالدىرىپ وتىرمىز», – دەدى ۆيتسە-پرەمەر.