ايەل 20 جىل بويى بەكەر جالاقى الىپ, جۇمىس بەرۋشىسىن سوتقا بەردى.

فوتو:depositphotos.com

فرانتسيا تۇرعىنى Orange تەلەكوممۋنيكاتسيا كومپانياسىن «جۇمىس ورنىندا كەمسىتۋشىلىك جاسادى» دەپ سوتقا بەرىپ, كومپانيانى وعان ەشقانداي جۇمىس تاپسىرماسىن بەرمەي 20 جىل بويى جالاقى تولەدى دەپ ايىپتادى, دەپ حابارلايدى Tengri Life.

Oddity Central مالىمەتتەرى بويىنشا, لوۋرەنس ۆان ۆاسسەنحوۆ 1993 جىلى France Telecom كومپانياسىنا كىرگەن, كەيىنىرەك Orange كورپوراتسياسى ونىڭ جۇمىس ورنىڭ ساتىپ الادى. ءبىرىنشى جۇمىس بەرۋشى ايەلدىڭ تۋىلعاننان باستاپ گەميپلەگيالىق (بەت پەن اياق-قولدىڭ جارتىلاي سال اۋرۋى) ەكەنىن جانە ەپيلەپسيامەن اۋىراتىنىن ءبىلىپ, وعان مەديتسينالىق جاعدايىنا سايكەس قىزمەت ۇسىنادى. ۆاسسەنحوۆە 2002 جىلعا دەيىن حاتشى  بولىپ جۇمىس ىستەدى, سودان كەيىن فرانتسيانىڭ باسقا ايماعىنا اۋىستىرۋدى سۇرادى.

ونىڭ ءوتىنىشى ماقۇلداندى, بىراق ونىڭ جاڭا جۇمىس ورنى ونىڭ قاجەتتىلىكتەرىنە سايكەس كەلمەدى جانە كاسىپتىك مەديتسينانىڭ ۇكىمى بويىنشا وعان ۇسىنىلعان لاۋازىم سايكەس كەلمەيتىنىن راستادى.

وسىعان قاراماستان, Orange ارنايى قىزمەتكەردىڭ جۇمىس ورنى مەن ونىڭ لاۋازىمىنا قاتىستى كەمشىلىكتەردى تۇزەتپەدى. كەيىنگى 20 جىل بويى ايەل ەشبىر جۇمىس تاپسىرماسىن ورىنداماي-اق تولىق جالاقىسىن الدى.

ايەل بىرنەشە رەت جۇمىس بەرۋشىنىڭ نازارىن اۋدارۋعا تىرىسقانىمەن, ناتيجە بولمادى. 2015 جىلى ول ۇكىمەت پەن سوتقا «دەنساۋلىعىنا بايلانىستى جۇمىستا مورالدىق قىسىم كورسەتۋ جانە كەمسىتۋشىلىك» تۋرالى شاعىممەن جۇگىندى. الايدا جۇمىستاعى جاعداي وزگەرگەن جوق. ول ءالى دە بوس وتىردى, بىراق سونىمەن بىرگە جالاقىسىن ۇنەمى الىپ وتىردى. لورانستىڭ ادۆوكاتتارى وسىلايشا جۇمىس بەرۋشى ونى جۇمىستان كەتۋگە ماجبۇرلەمەك بولدى دەپ ەسەپتەدى.

– مۇگەدەك ادامعا ارنالعان جۇمىس – بۇل قوعامداعى الەۋمەتتەنۋ, بايلانىستار قۇرۋ. بۇل جاعدايدا لوۋرەنس ۆان ۆاسسەنحوۆتى مۇنىڭ بارىنەن شەكتەدى. ول كەتەدى دەگەن ۇمىتپەن ونى 20 جىل بويى «سورەگە يتەرىپ» قويدى,–دەدى ايەلدىڭ ادۆوكاتى.

Orange كومپانياسى ايتۋىنشا, ولار ۆان ۆاسسنەحوۆ ەڭ جاقسى جاعدايدا جۇمىس ىستەۋى ءۇشىن قولدان كەلگەننىڭ ءبارىن جاساعان. كورپوراتسيا سونىمەن قاتار ايەلدىڭ «جەكە الەۋمەتتىك جاعدايىن» ەسكەرىپ, وعان ۇنەمى تولىق جالاقى, سونداي-اق بىرنەشە قايتارىلمايتىن جاردەماقى تولەيتىندىگىن اتاپ ءوتتى. «بەيىمدەلگەن لاۋازىمدارعا قايتا ورالۋ» دا جوسپارلانعان سياقتى, بىراق ول ەشقاشان بولعان ەمەس, ويتكەنى ايەل ۇنەمى اۋرۋحانادا جاتاتىن.