«ايەل بارىنە كونۋ كەرەك…»: التىناي جوراباەۆانىڭ جازباسى وقىرماندى ويلاندىرىپ قويدى

فوتو: instagram.com/ altynaizhorabayeva

ءانشى التىناي جوراباەۆا الەۋمەتتىك جەلىدەگى پاراقشاسىندا ايەلگە كوپ جاۋاپكەرشىلىك ارتىلاتىنىنا نارازىلىق ءبىلدىردى, — دەپ حابارلايدى Aikyn.kz.   

ونەر يەسى تۇرمىستىق زورلىق-زومبىلىققا تاپ بولعان ايەلدەر جايلى ءسوز قوزعادى. ول قىز بەن ۇلدى ءبولىپ-جارماي, جاستايىنان ەڭبەككە باۋلىپ تاربيەلەۋ كەرەك دەپ ەسەپتەيدى.

«نەگە? «قىز سىنى» نەگە? «جىگىت سۇلتانى? ءاۋ باستان, قىز بالاسىن سىنعا الىپ, ءبارىن ايەل ادامنان تالاپ ەتۋ, بۇكىل جاۋاپكەرشىلىكتى ايەل ادامعا ارتىپ قويۋدى قانعا ءسىڭىرىپ, ويعا ءتۇيىپ تاستاعان سياقتى ما, قالاي ءوزى? قىز نازىك, قىزدىڭ جولى جىڭىشكە, قىزعا قىرىق ۇيدەن تىيىم دەيدى دە, قىزدىڭ قىرىق جانى بار دەپ قوياتىنىمىز قالاي? بىلاي قاراساڭ, نازىك, ءالسىز دەگەن سياقتى ايتىپ كەلىپ, بىراق سول ء«السىز جاراتىلىسقا» ۇستەمدىك جاساپ, السىزگە الىمجەتتىك كورسەتىپ, بىراق قايتادان بۇكىل ءۇيدىڭ تىرلىگىن, بۇكىل جاۋاپكەرشىلىكتى, ياعني كۇيەۋى ءىشىپ كەتسە, قۇمار ويىن ويناپ كەتسە, ءىشىپ كەلىپ ۇرسا, ءجۇرىس جۇرسە, ايەل ءۇنىن شىعارماي, كونىپ, بالا-شاعانى باعىپ, ءۇيدىڭ شارۋاسىن جاساپ ءجۇرۋدى تالاپ ەتۋدى قالاي تۇسىنۋگە بولادى? ناعىز ەر-ازاماتتى سىيلامايتىن, تاپقان تابىسىنىڭ بەرەكەسىن قاشىرىپ وتىراتىن ايەلدەر دە بار! مىناۋ ەركەكتىڭ, مىناۋ ايەلدىڭ جۇمىسى دەپ بولمەي, كىشكەنتايىنان ۇلدى دا, قىزدى دا ءۇي شارۋاسىنا, دالا شارۋاسىنا باۋلىپ تاربيەلەگەندە, ايەل ەرىنە, ەرى ايەلىنە كومەكتەسىپ, تۇسىنىستىكپەن ءومىر ءسۇرىپ, بەرەكەلى وتباسى بولادى دەپ ويلايمىن. مەنىڭ وقىرماندارىمنىڭ ويى قالاي ەكەن?» — دەپ جازدى ءانشى.