Áıelder quramasy Azıadada top jardy

Foto:mınıstrlik

Búgin shaıbaly hokkeıden elimizdiń áıelder komandasy Ońtústik Koreıadan basym túsip, Harbın qalasynda ótip jatqan IX qysqy Azııa oıyndarynyń kúmis júldesine qol jetkizdi. Sheshýshi matchtyń esebi: 3-0, dep jazdy qandastar.kz

Birinshi kezeńde san basymdyǵyn tıimdi paıdalanyp shabýylshymyz, kapıtannyń biri Malıka Aldabergenova esep ashty. Al sheshýshi aınalymnyń basynda Iýlııa Býtorına joıqyn soqqymen esepti eseledi. Taǵy bir shaıbanyń avtory — Darııa Moldabaı.

Jalpy Qazaqstan osy básekede Qytaıdyń Gonkong (12-0), Taıland (9-0), Qytaıdyń Taıpeıi (5-1), Qytaı (2-1), Ońtústik Koreıa (1-0) komandasyn utyp, tek Japonııaǵa (0-4) jol berdi.

Bul — hokkeıden áıelder quramasynyń Azııa oıyndaryndaǵy 7-shi júldesi (3 altyn, 3 qola) jáne sonyń ishindegi alǵashqy kúmis medali.

Taǵy bir qyzyq jaıt, Qazaqstan quramasy tarıhyndaǵy eń iri jeńis osy Ońtústik Koreıamen baılanysty. 2003 jylǵy aq Azıadada bizdiń hokkeıshiler búgingi qarsylastyń qaqpasyna jaýapsyz 19 shaıba salǵan.