«ايەلدى حيدجاب كيمەگەننەن ءولتىرىپ جاتىر»: ءىىم تانىمال ءانشىنىڭ مالىمدەمەسىنەن كەيىن تەكسەرىس باستادى

ىشكى ىستەر مينيسترلىگى ءانشى ۇلانعاسىر قاميەۆتىڭ مالىمدەمەسىن تەكسەرەدى. بۇل تۋرالى ۆەدومستۆونىڭ ءباسپاسوز قىزمەتى حابارلادى.

بۇعان دەيىن تانىمال ءانشى ايەلدەردى نەلىكتەن كۇيەۋى ولتىرەتىنى تۋرالى ويىن ايتقانبولاتىن.

ءانشىنىڭ ءسوزى جەلىدە حالىقتىڭ سىنىنا ۇشىرادى. ال Saida Kastaneda ەسىمدى Facebook قولدانۋشىسى ءانشىنىڭ سوزدەرىن تەكسەرۋدى سۇراپ ىشكى ىستەر مينيسترلىگىنە جۇگىنگەنىن جازدى.

بۇگىن ە-ءوتىنىش ارقىلى ىشكى ىستەر مينيسترلىگىنە قىلمىستىق كودەكستىڭ 174-بابىنا سايكەس, الەۋمەتتىك جانە گەندەرلىك ارازدىقتى قوزدىرعانى, ايەلدەرگە وشپەندىلىك تۋدىرعانى جانە ايەلدەردى/قىزداردى كۇيەۋىنىڭ, بۇرىنعى كۇيەۋىنىڭ, جىگىتى مەن تۋىس ەر ادامدارىنىڭ قولىنان زورلىقپەن ولتىرىلگەنىن جانە دەنە جاراقاتىن العانىن اقتاعانى ءۇشىن مالىمدەمەسىن تەكسەرۋدى سۇراپ ارىز جازدىم, – دەدى سايدا.

بۇل تۋرالى nur.kz تىلشىسىنە ىشكى ىستەر مينيسترلىگىنىڭ ءباسپاسوز قىزمەتى پىكىر ءبىلدىردى.

ءوتىنىش تىركەلدى. تەكسەرىس ءجۇرىپ جاتىر, ونىڭ قورىتىندىسى بويىنشا پروتسەسۋالدىق شەشىم قابىلدانادى, – دەپ حابارلادى ءىىم وكىلدەرى.