«Áıeldiń erkindigin shekteý bul»: Baıan Alagózova Rústem Júginisovke tekseris júrgizýdi talap etti

Prodıýser Baıan Alagózova ánshi Rústem Júginisovtiń «meshitke áıelder kúıeýimen nemese baýyrlarymen barýy kerek» degen pikiri úshin tekseris júrgizýdi talap etti, dep habarlaıdy qandastar.kz

Bul týraly ol Instagram paraqshasyndaǵy stories-te jarııalady.

«Nıkıah dep qyzdan bir rettik jynystyq qatynas surap tur. Eń soraqysy – ánshi Rústem Júginisov qyzdarǵa kúıeýsiz nemese baýyrlarymen birge barmaı, jalǵyz júrmeńder dep keńes berip otyr. Men ýákiletti organdardan onyń áreketine qatysty kem degende túsindirme jumystaryn júrgizýdi suraımyn. О́ıtkeni bul – áıelderdiń quqyqtary men erkindikterin qoǵamdyq keńistikte tikeleı shekteý. Biz sharıǵat jolyndaǵy emes, táýelsiz memlekette ómir súremiz. Qyz bolsyn, áıel bolsyn ózi kez-kelgen jerge barýǵa, júrýge quqyly. Aıtqan sózińizge jaýap beresiz be? Adamdardy olaı adastyrmańyz. Sizge unamasa, Aýǵanstan, Iran, Arab elderine kóship ketińiz», – dedi prodıýser.

Aıta keteıik, buǵan deıin Aqtóbedegi «Nur Ǵasyr» meshitinde oramal taqqan jas qyzǵa belgisiz er adam ıntımdik usynys jasap, «bir rettik neke» jasaıyq dep tıisken bolatyn. Bul oqıǵa qoǵamda úlken rezonans týdyryp, qyzý talqyǵa tústi. Osy jaǵdaıǵa baılanysty ánshi Rústem Júginisov: «Eger meshitte solaı júrseńizder, er adamdar túrli oıǵa ketýi múmkin. Sondyqtan abaı bolyńyzdar. Namazdy keshke úıde oqyǵan durys», – dep pikir bildirgen.