ايەلدىڭ كوزىن كوگەرتىپ جارناما تۇسىرگەندەردىڭ ارەكەتى جەلىدە داۋ تۋدىردى

الەۋمەتتىك جەلىدە جيھاز زاۋىتىنىڭ جارناماسى داۋ تۋدىردى, دەپ حابارلايدى Skifnews.kz اقپارات پورتالى.

جارناماعا ۇڭىلسەك, ەرلى-زايىپتى جيھاز تاڭداۋ ءۇشىن دۇكەنگە كەلەدى. ايەلى وتاندىق ءونىمدى قولداسا, كۇيەۋى شەتەلدەن قارايىق دەپ بوي بەرمەيدى. كەلىسپەۋشىلىكتىڭ سوڭى كۇيەۋىنىڭ ايەلىنە قول كوتەرۋىمەن اياقتالادى.

بەلگىلى كوۋچ-ەكسپەرت روزا اشىرباەۆا بۇل جارناماعا شۇيلىگىپ, بۇل جيھازداردى ساپاسىز تاۋارعا تەڭەدى.

“تاۋارلارىنىڭ ناشارلىعى سونشا, ايەلدىڭ كوزىن كوگەرتپەسە ساتا المايتىن بولىپ تۇر عوي. وتە تومەن دارەجەدەگى تاۋارعا وتە تومەن دارەجەدەگى جارناما لايىق. بيزنەس باسشىسى وتىرىكشى بولسا, تاۋارى دا ساپاسىز دەگەن ءسوز. ءبىز ايەلدى سىيلايمىز دەپ قويىپ, ايەلدىڭ كوزىن كوگەرتىپ, كەلەمەجدەپ جارناما ءتۇسىرىپ ءمازسىز. قاي كوزبەن قاراساڭ دا, زورلىق ول – زورلىق. كوزىڭدى باقىرايتىپ قويىپ, اقتى قارا دەپ, قارانى اق دەۋ – وتىرىكشىنىڭ ءىسى”, – دەپ اشۋلاندى كوۋچ.

ودان كەيىن قوعام بەلسەندىسى ايگەرىم قۇسايىنقىزى دا روليك تۇسىرگەندەردى زاڭ الدىندا جاۋاپقا تارتۋ كەرەك ەكەنىن ايتتى.

ال مەكەمە باسشىسى جەلىدە داۋ تۋعىزعان ۆيدەوعا قاتىستى پىكىر ءبىلدىردى.

“روزا حانىم, بۇل ۆيدەو ءازىل رەتىندە ءتۇسىرىلىپ تۇر, بىراق سوندا دا ءبىزدىڭ ءونىمدى تومەن دارەجەدە دەگەنىڭىز بولمادى. وتاندىق ءونىمدى دامىتايىق, قازاقستاننىڭ ەكونوميكاسىن كوتەرەيىك دەپ جۇمىس ىستەپ جاتىرمىز. مەكەنجايىڭىزدى ايتساڭىز, سىيلىققا ءبىر ورىندىق جىبەرەيىك. وتاندىق ءونىمنىڭ ساپاسىن كورىپ, قۋانىپ قالاسىز”, – دەپ جازدى كاسىپكەر