“ايەلىن تانىمايمىن”: رۋسلان بەردەنوۆ وزىنە قاستاندىق جاساعان كۇدىكتىنىڭ سوتتا ايتقان مالىمدەمەلەرىنە جاۋاپ بەردى

كوللاج: Stan.kz

شىمكەنت اكىمىنىڭ ورىنباسارى رۋسلان بەردەنوۆ وزىنە قاستاندىق جاساعان كۇدىكتىنىڭ سوتتا ايتقان مالىمدەمەلەرىنە جاۋاپ بەردى, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

بەردەنوۆ بەس وق جاراقاتىنان كەيىنگى وڭالتۋ كەزەڭىنەن ءوتىپ جاتقانىنا بايلانىستى سوت وتىرىستارىنا جەكە قاتىسا المايتىنىن, الايدا سوت بارىسىن ءجىتى باقىلاپ وتىرعانىن اتاپ ءوتتى. شەنەۋنىك كۇدىكتىنىڭ سوتتا ايتقاندارىن بوپسالاۋ جانە قىسىم كورسەتۋ ارەكەتى دەپ اتادى.

«سوتتا جاۋاپكەر جيەنباي تاراپىنان ايتىلىپ جاتقان مالىمدەمەلەرگە ءۇنسىز قالۋ مۇمكىن ەمەس. سوڭعى رەت مەن ونى سول كۇنى, ءدال ءوزى اڭشى مىلتىعىنان اتىپ كەتكەن كەشتە كوردىم. ودان كەيىن بىزدە ەشقانداي بايلانىس بولعان جوق”, – دەلىنگەن شەنەۋنىكتىڭ جازباسىندا.

سونداي-اق بەردەنوۆكە كۇدىكتىنىڭ وكىلدەرى حابارلاسىپ, كەشىرىم بەرۋىن تالاپ ەتىپ, كەشىرىم بەرمەسە شۋ شىعاراتىندارىن, كۇدىكتىنىڭ اكەسى ءوزىن ورتەيتىنىن ايتىپ قىسىم كورسەتكەن كورىنەدى.

«ول وكىلدەرىمەن بىرگە مەنىڭ قورعاۋشىلارىممەن بايلانىس ورناتۋعا تىرىسىپ, «دوستاسۋدى» ۇسىندى. كەشىرىم بەرىلسە, شۋ كوتەرمەيمىز دەدى, ال باس تارتقان جاعدايدا «اقپاراتتىق جارىلىس» جاسايمىز دەپ سەس كورسەتتى. ءتىپتى, ايىپتالۋشىنىڭ اكەسى ءوزىن-ءوزى ورتەيدى دەگەن مالىمدەمە جاسالاتىنىن ايتتى. مۇنى مەن تىكەلەي قىسىم دەپ باعالايمىن”, – دەيدى بەردەنوۆ.

رۋسلان بەردەنوۆ كۇدىكتىنىڭ ايەلىن تانىمايتىنىن ايتىپ, كۇدىكتىنىڭ سوتتا ايتقان “قىزعانىش”, “بەردەنوۆ ايەلىمە حابارلاما جازدى” سوزدەرىن جوققا شىعاردى.

«قاقتىعىستىڭ ءتۇپ-توركىنى — كاسىبي, قىزمەتتىك سيپاتتا. جاۋاپكەر كەلىسىم اياسىنداعى جۇمىسىن ادال اتقارعىسى كەلمەدى, ەسەپ بەرۋدەن جالتاردى. مەن تەك اشىقتىق پەن مىندەتتەمەلەردىڭ ورىندالۋىن تالاپ ەتتىم. ال قوعام نازارىن «قىزعانىش», «جەكە قاتىناس», «جۇبايى» سەكىلدى جالعان سەبەپتەرگە بۇرۋ — مانيپۋلياتسيا, شىندىقتان الىستاتۋ. مەن ونىڭ جۇبايىن دا, وتباسىن دا تانىمايمىن. ول مەن ءۇشىن تەك مەردىگەر بولاتىن”, –  دەلىنگەن جازبادا.

سونداي-اق شەنەۋنىك كۇدىكتىنىڭ «بەردەنوۆ قاستاندىققا شىمكەنت اكىمى عابيت سىزدىقبەكوۆ تاپسىرىس بەردى دەپ ايتۋىمدى سۇرادى” دەگەن مالىمدەمەسىن دە جوققا شىعاردى.

«بۇدان دا سوراقىسى – بۇگىن بۇل جالعان مالىمدەمەلەرگە قالا اكىمىنە قاتىستى تۇستاردى دا قوسىپ جاتىر. بۇل تاعى دا ءىستىڭ اقيقاتقا ەمەس, قىسىم كورسەتۋ مەن بەدەلگە نۇقسان كەلتىرۋگە باعىتتالعان ورەسكەل مانيپۋلياتسيا ەكەنىن دالەلدەيدى. مەن مۇنداي مالىمدەمەلەردى ءۇزىلدى-كەسىلدى جوققا شىعارامىن جانە ولاردى مويىندامايمىن”, – دەلىنگەن بەردەنوۆتىڭ جازباسىندا.

رۋسلان بەردەنوۆ دەنەسىندە اڭشى مىلتىعىنىڭ قورعاسىن وقتارىنىڭ قالدىقتارى ءالى دە بار ەكەنىن ايتىپ, رەنتگەن فوتولارىن جاريالادى. شەنەۋنىك سوتقا جەكە قاتىسا المايتىنىن, سوتتىڭ ادىلدىگىنە سەنەتىنىن اتاپ ءوتتى.

ەسكە سالساق, شىمكەنتتە قالا اكىمىنىڭ ورىنباسارىنا قاستاندىق جاساعان كۇدىكتىگە قاتىستى سوت جالعاسۋدا. بۇگىنگى سوت وتىرىسىندا كۇدىكتى قىلمىس جاساۋىنا قىزعانىش سەبەپ بولعانىن ايتقان ەدى.