“Áıelin tanymaımyn”: Rýslan Berdenov ózine qastandyq jasaǵan kúdiktiniń sotta aıtqan málimdemelerine jaýap berdi

Kollaj: Stan.kz

Shymkent ákiminiń orynbasary Rýslan Berdenov ózine qastandyq jasaǵan kúdiktiniń sotta aıtqan málimdemelerine jaýap berdi, dep jazdy qandastar.kz

Bul týraly Stan.kz aqparat agenttigi habarlaıdy.

Berdenov bes oq jaraqatynan keıingi ońaltý kezeńinen ótip jatqanyna baılanysty sot otyrystaryna jeke qatysa almaıtynyn, alaıda sot barysyn jiti baqylap otyrǵanyn atap ótti. Sheneýnik kúdiktiniń sotta aıtqandaryn bopsalaý jáne qysym kórsetý áreketi dep atady.

«Sotta jaýapker Jıenbaı tarapynan aıtylyp jatqan málimdemelerge únsiz qalý múmkin emes. Sońǵy ret men ony sol kúni, dál ózi ańshy myltyǵynan atyp ketken keshte kórdim. Odan keıin bizde eshqandaı baılanys bolǵan joq”, – delingen sheneýniktiń jazbasynda.

Sondaı-aq Berdenovke kúdiktiniń ókilderi habarlasyp, keshirim berýin talap etip, keshirim bermese shý shyǵaratyndaryn, kúdiktiniń ákesi ózin órteıtinin aıtyp qysym kórsetken kórinedi.

«Ol ókilderimen birge meniń qorǵaýshylarymmen baılanys ornatýǵa tyrysyp, «dostasýdy» usyndy. Keshirim berilse, shý kótermeımiz dedi, al bas tartqan jaǵdaıda «aqparattyq jarylys» jasaımyz dep ses kórsetti. Tipti, aıyptalýshynyń ákesi ózin-ózi órteıdi degen málimdeme jasalatynyn aıtty. Muny men tikeleı qysym dep baǵalaımyn”, – deıdi Berdenov.

Rýslan Berdenov kúdiktiniń áıelin tanymaıtynyn aıtyp, kúdiktiniń sotta aıtqan “qyzǵanysh”, “Berdenov áıelime habarlama jazdy” sózderin joqqa shyǵardy.

«Qaqtyǵystyń túp-tórkini — kásibı, qyzmettik sıpatta. Jaýapker kelisim aıasyndaǵy jumysyn adal atqarǵysy kelmedi, esep berýden jaltardy. Men tek ashyqtyq pen mindettemelerdiń oryndalýyn talap ettim. Al qoǵam nazaryn «qyzǵanysh», «jeke qatynas», «jubaıy» sekildi jalǵan sebepterge burý — manıpýlıaııa, shyndyqtan alystatý. Men onyń jubaıyn da, otbasyn da tanymaımyn. Ol men úshin tek merdiger bolatyn”, –  delingen jazbada.

Sondaı-aq sheneýnik kúdiktiniń «Berdenov qastandyqqa Shymkent ákimi Ǵabıt Syzdyqbekov tapsyrys berdi dep aıtýymdy surady” degen málimdemesin de joqqa shyǵardy.

«Budan da soraqysy – búgin bul jalǵan málimdemelerge qala ákimine qatysty tustardy da qosyp jatyr. Bul taǵy da istiń aqıqatqa emes, qysym kórsetý men bedelge nuqsan keltirýge baǵyttalǵan óreskel manıpýlıaııa ekenin dáleldeıdi. Men mundaı málimdemelerdi úzildi-kesildi joqqa shyǵaramyn jáne olardy moıyndamaımyn”, – delingen Berdenovtiń jazbasynda.

Rýslan Berdenov denesinde ańshy myltyǵynyń qorǵasyn oqtarynyń qaldyqtary áli de bar ekenin aıtyp, rentgen fotolaryn jarııalady. Sheneýnik sotqa jeke qatysa almaıtynyn, sottyń ádildigine senetinin atap ótti.

Eske salsaq, Shymkentte qala ákiminiń orynbasaryna qastandyq jasaǵan kúdiktige qatysty sot jalǵasýda. Búgingi sot otyrysynda kúdikti qylmys jasaýyna qyzǵanysh sebep bolǵanyn aıtqan edi.