«ايەلىڭ – جەزوكشە, بالاڭ جەتىم قالادى»: كۇدىكتى جيەمباي ءوزىن رۋسلان بەردەنوۆ ەكى اپتا قورلاعانىن ايتتى

فوتو: contur.kz

شىمكەنت قالالىق سوتىندا قالا اكىمىنىڭ ورىنباسارى رۋسلان بەردەنوۆتى جارالاعان كۇدىكتى ەرنار جيەمبايدان جاۋاپ الۋ جالعاسىپ جاتىر, دەپ حابارلايدى qandastar.kz Kursiv.media-عا سىلتەمە جاساپ.

بۇعان دەيىن جيەمباي رۋسلان بەردەنوۆپەن بولعان العاشقى كەزدەسۋى قالاي باستالعانىن ايتقان ەدى. جيەمبايدىڭ پىكىرىنشە, وسى ءبىرىنشى كەزدەسۋىنشە بەردەنوۆ ونىڭ ءار سوزىنە شۇيلىككەن. ار-نامىسىنا تيەتىن سوزدەر ايتقان.

«سەنىڭ ءتۇرىڭ قانداي قانداي ءوزى? شاشتارىڭ ءتۇسىپ قالعان. قايدان كەلگەنسىڭ ءوزىڭ» دەدى. كوڭىلىمە ءتيىپ كەتتى. بىراق ول كىسىگە ارتىق ءسوز ايتپادىم. «جۇمىستا وسىلاي كيىنەسىڭدەر مە سەندەر» دەدى. جاعدايدى تۇسىندىرەيىن دەپ ەدىم, ۋىن شاشىپ جىبەرەدى. قابىلداماي جاتتى. مەن سويلەيمىن, ول جەرگە كىرگىزەدى. جۇمىسىمدى كورسەتەيىن دەسەم, «سەن ءوزى قانداي ادامسىڭ» دەپ, بالاعاتتادى. كابينەتىنەن شىعىپ كەتتىم», – دەدى ول.

جيەمبايدىڭ الدىنان كومەكشىسى شىعىپ قالعان. وعان بار جايدى ايتقاندا كۇتە تۇرۋىن سۇراعان. كومەكشىسى قايتا كىرۋىن سۇراعان. «تۇرعىن ءۇي شىمكەنت» جاۋاپكەرشىلىگى شەكتەۋلى سەرىكتەستىگىنىڭ 2024 جىلعى بيۋدجەتى تۋرالى جۇمىسىن ايتا باستاعاندا ءسوزىن قايتا توقتاتقان.

«سەن مىلقاۋسىڭ با, وتىرشى» دەدى. «نە ءۇشىن ار-نامىسىما تيەتىن سوزدەردى ايتىپ وتىرسىز, جەكەمە وتپەسەڭىزشى» دەدىم. «ارىز جازا سالشى» دەدى. «كەتەم» دەدىم. بالاعاتتادى. «شىق تا كەتشى» دەدى. كەتتىم. مەن نە ىستەپ قويدىم? كەشكە قالالىق قۇرىلىس باسقارماسىنان حابارلاسىپ, بەردەنوۆ سەنى «سوتتاتامىن» دەپ جاتىر دەپ سالەمدەمەسىن ايتتى», – دەدى سوتتالۋشى.

جيەمباي بەردەنوۆتىڭ بۇل سالەمدەمەسىن بىرنەشە ادامنان ايتقىزعان. سودان كەيىن جيەمباي بەردەنوۆپەن اشىق سويلەسۋ امالىن ىزدەگەن. 5 ادامعا «ەسىگىمدى اتتاپ باسپاسىن, مەن ونى سوتتاتامىن, ودا مۇمكىندىك جوق. مىنەز كورسەتتى» دەگەن. اراعا تاعى 5 ادامدى سالىپ, بەردەنوۆپەن قايتا كەزدەسۋگە كەلىسكەن.

«ءبىر نارسە ىستەپ قويسام تۇسىنەمىن. ءجايدان ءجاي تاعدىرىمدى سىندىرىپ جىبەرەيىن دەپ جاتىر. ارادان ەكى اپتا ءوتتى. وسى ۋاقىت ىشىندە كۇيزەلىسكە ءتۇستىم, سترەسس الدىم. كابينەتىنە كەلدىم. بەردەنوۆ «سەن كىرشى» دەدى. ەڭ قاتتى اشۋلانعانىم سول جەر بولدى. «سەن ارىز جازبايمىن دەپ جاتىر ەكەنسىڭ عوي. ەرنار سەنى قاماتامىن. ايەلىڭ ادەمى ەكەن. قامالاسىڭ ايەلىڭ جەزوكشە بولادى, بالاڭ جەتىم قالادى. ساعان سول كەرەك پە?» دەدى. ۇندەمەدىم, بىراق اشۋلاندىم. بالاعاتتادى. «كىم نە ايتقانىن بىلمەيمىن. ءسىزدى قۇرمەتتەيمىن. مەنى قاماتامىن دەگەنىڭىزدى تۇسىنبەدىم. نە ءۇشىن ماعان ءتىس قايراپ تۇرسىز? نە ىستەدىم سىزگە? ايەلىمە لايك باسقانىڭىزدى كورىپ, قىزعانىش سەزىمدەرىمدى ايتىپ جاتقان جوقپىن» دەسەم, «سەن ايەلىڭدى ماعان جابىستىرما. قاتىنىڭا يە بول. وزىڭە سەنىمسىز ەركەكسىڭ عوي» دەپ مەنىڭ ايتقانىمبى باسقا جاققا بۇرىپ كەتتى», – دەدى جيەمباي سوتتا.

جيەمباي مەن بەردەنوۆتىڭ ءسوزى بۇل كەزدەسۋدە دە جاراسپاعان. جيەمباي اكەسىنىڭ ونكولوگيامەن اۋىراتىنىن, اپكەسى 4 بالاسىمەن اجىراسىپ كەلگەنىن, تۇڭعىش بالاسى ەرەكشە بالا ەكەنىن جەتكىزگەن. نامىسىنا تيمەۋدى سۇراعان.

«1 ايدا ارىزىڭدى جاز. ايەلىڭە ق..- عىڭ تۇرمايدى» دەگەندە ۇرىپ جىبەرگىم كەلدى. ءوزىمدى جەردەن تومەن سەزىندىم. «شەكتەن شىعىپ كەتتىڭىز» دەدىم دە شىعىپ كەتتىم. ولگىم كەلىپ كەتتى. نامىستان ءولىپ كەتتىم. ءوز-ءوزىمدى قويارعا جەر تاپپاي كەتتىم. ارادا ۋاقىت ءوتتى. 20 ءساۋىر كۇنى كەشكە ايەلىممەن ۇرىس باستالدى. تاڭەرتەڭ بالا-شاعانى بالاباقشاعا الىپ بارىپ, جۇمىسقا باراتىن بولدىم. ۇرىس جالعاستى. باسىمدى كەتىرگەن ايەلىمنىڭ «مەن كۇيەۋىمنىڭ بەلسەندى, بۇلشىق ەتتى, كەلەشەگى بار بولعانىن قالايمىن» دەگىنى. بۇل ەركەك رەتىندە نامىسىما ءتيىپ كەتتى. «كىمدى مىسالعا كەلتىرىپ تۇرسىڭ?» دەدىم. «رۋسلان بەردەنوۆ» دەدى», – دەدى سوتتالۋشى.

بۇل وقيعادان سوڭ سول كۇنى جيەمباي ايەلىمەن اجىراسۋعا سوتقا ارىز تۇسىرگەن. بۇعان ايەلى قارسى بولماعان. بۇگىنگى سوت وتىرىسىنا جابىرلەنۋشى بەردەنوۆ دەنساۋلىعىنا بايلانىستى كەلمەدى. وتكەن جولى الدىن الا تىڭداۋ كەزىندە سۋديا ابينۇر قاراباەۆ بەردەنوۆتىڭ سوتقا كەلىپ قاتىسۋىن مىندەتتەگەن ەدى.

ايتا كەتەيىك ەرنار جيەمبايدىڭ ءىسى سوتقا قىلمىستىق كودەكستىڭ «ادام ءولتىرۋ» (99-باپتىڭ 1-بولىگى) بابى جانە «قىلمىسقا دايىندالۋ جانە قىلمىسقا وقتالۋ» بابىمەن (24-باپتىڭ 3-بولىگى) تۇسكەن.