ايگۇل ورىنبەكتىڭ ۇستالعانى جونىندە اقپارات تارادى: زاڭگەردىڭ ءوزى حابارعا شىقتى

فوتو: اشىق دەرەككوز

ايگۇل ورىنبەكتىڭ ۇستالعانى جونىندە اقپارات تارادى, دەپ حابارلايدى Qaz365.kz.

بۇل تۋرالى الدىمەن, جۋرناليست ميحايل كوزاچكوۆ تەلەگرام-ارنادا جازدى.

«شىمكەنتتەن @ Koza4kov_bot-قا بلوگەر ايگۇل ورىنبەك بۇگىن سول جەردە ۇستالعانى تۋرالى اقپارات جەتتى. قازىر ول پوليتسيادا. ونىڭ ەسىمى «الاياقتىق», «سوتقا دەيىنگى ءىس جۇرگىزۋ دەرەكتەرىن جاريا ەتۋ» جانە «سوت تورەلىگىن جۇزەگە اسىرۋعا كەدەرگى جاساۋ» باپتارى بويىنشا تىركەلگەن قىلمىستىق ءىس شەڭبەرىندە اتالادى. باستاپقى دەرەككوزگە سىلتەمە جاساۋدى ۇمىتپاڭىزدار, كوتيكتەر», – دەپ جازعان ميحايل كوزاچكوۆ.

زاڭگەر فەيسبۋكتەگى سوڭعى جازباسىن كەشە جاريالاعان. ول جازباسىندا سپورت باسقارماسىنىڭ ساتىپ الۋ پورتالىندا قىركۇيەك ايىندا 893 ملن. تەڭگە قاراجاتقا ءبىر كوزدەن مەملەكەتتىك ساتىپ الۋ جاريالانىپ, قورىتىندى شىققانىن جازعان.

«شىمكەنت قالاسى اكىمدىگى سپورت باسقارماسىنىڭ باسشىسى ماراتبەك مىقتىبەكوۆ,  7 قازان كۇنى ءماسليحات دەپۋتاتتارىنىڭ الدىندا “ورداباسى كومانداسىنىڭ لەگيونەرلەرىنە گونورارعا” دەپ 1 ميللياردتتان استام قاراجات سۇراعان. ودان بولەك, جىل سوڭىنا  ەكى اي قالعاندا تاعى 1 ملرد استام قاراجات نە ماقساتتا سۇراپ وتىرسىز ماراتبەك مىرزا? وسىنداي سوممالار ءبىر كوزدەن بەرىلگەنى قانشالىقتى زاڭدى? جىل باسىندا ورداباسىعا بولىنگەن 5 ملرد نەلەرىڭە جەتپەي جاتىر شىمكەنت قالاسى اكىمدىگى? ونىڭ بارلىعى قايدا كەتىپ جاتىر? ءماسليحات دەپۋتاتتارى اقشا سۇراسا نەگە بەرە بەرەسىزدەر? قر باس پروكۋراتۋراسى  پرەزيدەنتتىڭ تاپسىرماسىن ورىندامايتىن باسشىلاردى تەرگەپ تەكسەرۋدى  سۇرايمىن. مينيستر ەربول مىرزابوسىنوۆ! ءسىزدى سپورت سالاسىن تازالاۋعا كەلگەنىڭىزدى بىلەمىن. ءبىزدىڭ شىمكەنت قالاسىنا كوڭىل ءبولۋىڭىزدى سۇرايمىن», – دەپ جازعان ايگۇل ورىنبەك.

Qaz365.kz تىلشىسى ايگۇل ورىنبەكتىڭ وزىنە حابارلاستى. ول ۆاتساپ ارقىلى «ءبارى دۇرىس» دەپ جاۋاپ بەردى. تولىققاندى اقپارات الداعى ۋاقىتتا بەرىلەدى.