«ايقايلاپ كۇلەتىن»: اجەتحانادان تابىلعان اسىلىمنىڭ اناسى كورشىنىڭ قىزى جايلى ايتتى

كوللاج: inbusiness.kz

تۇركىستان وبلىسىندا دەنەسى دارەتحانادان تابىلعان 3 جاسار اسىلىمنىڭ اناسى بولعان جايتقا قاتىستى پىكىر ءبىلدىردى, دەپ حابارلايدى Ozgeris.info ءتىلشىسى AzatNews اقپاراتتىق پورتالىنا سىلتەمە جاساپ.

«وسىدان بىرنەشە اي بۇرىن جوعالعان, ءۇش كۇن كۇندىز-ءتۇنى ىزدەگەن اسىلىمنىڭ اناسىمىن. بۇكىل حالىق بولىپ ىزدەدىك. سىرگەلى اۋىلى, سارىاعاش قالاسى, تۇركىستان وبلىسى – ءبارى ىزدەدى. ات سالىسپاعان ادام جوق. كۇندىز-ءتۇنى ۇيىقتاماي ىزدەدى. (قىزىمنىڭ ) ءولى دەنەسىن تاپتىق. قاتىگەزدىكپەن ولتىرىلگەن بولىپ شىقتى, اجەتحانادان تابىلدى. جۇرەگىمىز اۋىرىپ, قان جىلايدى. ميليتسيا ايعاقتار جوق دەگەنمەن بىزدە كۇمان بولدى. ءوز ولىمىمەن قايتىس بولدى دەگەنگە سەنبەدىك, (اجەتحانانىڭ) كىشكەنتاي تەسىگىنە بالا سىيۋى مۇمكىن ەمەس. مەن قانشا شىرىلدادىم, قانشا جۇگىردىم. وتباسىمىزبەن ءوزى ءتۇسىپ كەتكەنىنە سەنبەدىك. انا جۇرەگى سەزدى. وسى شىندىق شىققانشا كۇندىز-ءتۇنى ۇيىقتاي المادىم. جازالانسىن, ەل ءبىلسىن, كورسىن دەپ بۇكىل قازاقستانعا ايقايلاپ ايتقىم كەلەدى», — دەدى اسىلىمنىڭ اناسى بەرگەن سۇحباتىندا.

سوزىنشە, مۇنداي جاعداي ەكىنشى رەت قايتالانىپ وتىر.

«كىشكەنتاي بەس جارىم جاسار قىزدى اجەتحاناعا تاستالعاننان كەيىن بارىپ ونىڭ بەتى اشىلىپ وتىر. اللا ساقتاپ, ول قىز امان قالدى. ءوتىپ بارا جاتقان كورشى بالامىز ەستىپ قالدى. سونىڭ ارقاسىندا مەنىڭ قىزىمنىڭ قاساقانا ولتىرىلگەنى جاريا بولىپ وتىر. ەڭ باستىسى قىز مويىندادى. تەرگەۋ پروتسەسى ءالى ءجۇرىپ جاتىر. جاقىندا سوت باستالادى. جۇرەگىمىز قان جىلاپ وتىر», — دەدى قايتىس بولعان اسىلىمنىڭ اناسى.

ول قايعىلى جاعدايدان كەيىن كورشى قىزعا سەزىكتەنىپ جۇرگەنىن جەتكىزدى.

«مەن سەزدىم. ويتكەنى ول كۇنى بويى مۋزىكا قويىپ, ايقايلاپ كۇلەتىن. ول قىزدا قاتىگەزدىك كوپ ەدى. مەنىڭ بالالارىم ءجۇرىپ بارا جاتقاندا ۇرىپ كەتەتىن, قىزدارىم ونى كورگەن كەزدە ۇيگە كىرىپ, ول كەتكەننەن كەيىن عانا دالاعا شىعاتىن. بالام ادەمى كۇشىك اكەلسە, ول كۇشىكتى دە قاپقا سالىپ, اعىزىپ جىبەرەتىن. ونىڭ قاتىگەزدىگىن ءبىلدىم. دالەل بولماعان سوڭ ايتا المادىم», — دەپ جالعاستىردى سپيكەر.

بۇگىندە اۋىل تۇرعىندارى كۇدىكتى قىزدىڭ وتباسى باسقا جاققا كوشىپ كەتسىن دەپ تالاپ قويىپ وتىر.

ايتا كەتۋ كەرەك, وسىعان دەيىن تۇركىستان وبلىسىندا 3 جاسار قىزدىڭ دەنەسى دارەتحانادان تابىلعانىن جازعان بولاتىنبىز.