ءبىلىم
«ايلىق الا الماي, نەسيە الۋعا ءماجبۇرمىز»: الماتىداعى Qazbilim ۇلتتىق ليتسەيىنىڭ مۇعالىمدەرى مالىمدەمە جاسادى
كوللاج: Stan.kz
الماتىداعى Qazbilim ۇلتتىق ليتسەيىندەگى قىزمەتكەرلەر جالاقىلارىن الا الماي جاتقانىن ايتىپ, شۋ شىعاردى, دەپ جازدى qandastar.kz
بۇل تۋرالى Stan.kzاقپارات اگەنتتىگى حابارلايدى.
رەداكتسيامىزعا جەكەمەنشىك مەكتەپتىڭ وقىتۋشىلارى شىعىپ, سوڭعى ءبىر جىلدا جالاقىلارىن ۋاقىتىلى الا الماي جۇرگەنىن ايتتى. ولار اتتارىن اتاماۋدى ءجون كورىپ, ءانونيمدى تۇردە اڭگىمەلەستى. وسى ماسەلەنىڭ كەسىرىنەن كەيبىر قىزمەتكەرلەر قىسىمعا ۇشىراپ, وتباسىندا ءتۇرلى ماسەلەگە تاپ بولعان كورىنەدى.
“جۇمىستان شىقساق, ەڭبەك كىتاپشامىزعا نەگاتيۆ پىكىر جازىپ بەرمەك”
“مەكتەپتىڭ اتىنا كىر كەلتىرۋ ويىمىزدا جوق. ەڭبەكاقىمىزدى الا الماي وتىرعاسىن, ادىلەتسىزدىككە شىدامادىق. كەيبىر ادامدار “نەگە شىعىپ كەتپەدىڭ?” دەپ جازىپتى. جىل ورتاسىندا ءبىزدى كىم جۇمىسقا الادى?! ودان كەيىن جۇمىس بەرۋشىنىڭ “ەڭبەك كىتاپشالارىڭا سىناقتان وتپەدى” دەپ جازىپ بەرەمىز” دەپ قورقىتقانىن دا ەستىدىك” – دەدى ليتسەي قىزمەتكەرى.
ودان كەيىن تاعى ءبىر ورتالىق قىزمەتكەرى ارىپتەستەرىنىڭ ايلىق الا الماعاسىن نەسيەگە كىرىپ كەتكەنىن دە جاسىرمادى.
“ارىپتەستەرىمىز ەڭبەكاقىسىن الا الماعاسىن نەسيەگە باتتى”
“بىزگە قىسىم كوپ بولادى. وسىنداي جاعدايدا كەيبىر ارىپتەستەرىمىز ءۇنسىز قالدى. 70 مۇعالىمنەن 7 مۇعالىمنىڭ شىقپاعانى وكىنىشتى. بۇل شۋ ەكى جىلدان بەرى بار. مۇعالىمدەردىڭ شىدامى وسى كۇنگە دەيىن عانا جەتتى. ارىپتەستەرىمىز ەڭبەكاقاسىن الا الماعاسىن نەسيە الىپ كەتتى. ءتىپتى, نەسيەنى نەسيەمەن جاۋىپ وتىرعاندار دا بار. ايلىققا دەيىن قارىز اقشا العان قانشاما ارىپتەستەرىمىزدى بىلەمىز. كولىگى بار قىزمەتكەرلەر تاكسيست بولىپ كەتتى. الەۋمەتتىك تولەمدەر دە تۇسپەگەن. بارلىق جاۋاپكەرشىلىكتى مينيسترلىككە ارتىپ قويدى. ءبىز كەلىسىمشارتتى ليتسەي باسشىسىمەن جاسادىق. ءمامس-تە تۇسپەگەن. اۋرۋحاناعا تەكسەرىلە دە المايسىڭ. اقىلى تەكسەرىلۋگە دە اقشا جوق. ەكى جىلدان بەرى مينيسترلىك بەرمەي كەلسە, باسشى رەتىندە شەشىمىن تاپپاي ما?! ودان كەيىن ەكىنشى جۇمىس ىستەۋگە ۋاقىت جوق. تاڭعى 8-دەن 16.30-عا دەيىن جۇرەمىز. كەيبىر ارىپتەستەرىمىز كەشكى 7-گە دەيىن جۇرەدى. وتكەن جىلى ايلىق 10-15 كۇنگە كەشىكسە, بيىل ەكى ايعا دەيىن سوزىلىپ كەتتى. مىناداي جاعداي بولعان. ءبىر كۇنى 15 مۇعالىم حات جازىپ, باسشىلىققا ەسكەرتىپ, جۇمىسقا شىقپاي قويدى. سەبەپ – ايلىقتى كەشىكتىرۋ. سول كۇنگى اقشالارىن قيىپ تاستادى. شارشادىق شىنى كەرەك”, – دەيدى ليتسەي وقىتۋشىسى.
مۇعالىمنىڭ سوزىنشە, كەي كەزدە نە ءۇشىن اقشا كەرەك ەكەنىن دالەلدەيتىن جاعداي دا كەزدەسكەن.
“100 مىڭ تەڭگە اۋدارعانىن باسقا ارىپتەستەرىمىز بىلمەۋى كەرەك”
ء“بىز تەك ايلىققا قاتىستى ماسەلە كوتەردىك. قالعان ماسەلەلەر تۋرالى جاق اشپايمىز. ايتپاقشى, اقشا كەرەك ەكەنىن دالەلدەيتىن كەزدەر دە بولعان. “انامنىڭ تۋعان كۇنى”, “پاتەر يەسى قۋىپ جاتىر”, “نەسيە تولەيتىن كۇنىم” دەپ دالەل ۇسىنامىز, سوسىن بىزگە 100 مىڭ تەڭگە اۋدارادى. ونى بىراق باسقا ارىپتەستەرىمىز بىلمەۋى كەرەك. وقۋشىلارىمىز جەتىستىككە جەتىپ جاتىر. بىراق مۇعالىمدەردىڭ ەڭبەكاقىسىن بەرمەي وتىر. مۇعالىمدەردىڭ ارقاسىندا وقۋشىلار جوعارى ناتيجە كورسەتىپ وتىر. 30 مامىردا ەڭبەك دەمالىسىنا شىققان ارىپتەستەرىمىزدىڭ اقشاسىن ءالى تۇسىرگەن جوق. ماسەلە اقشانى بەرۋ نەمەسە بەرمەۋدە ەمەس, ءبارىبىر بەرۋگە ءتيىس. بىراق ماڭىزدىسى – ۋاقتىلى بەرۋ. سەبەبى وسى ايلىقپەن قانشاما ادام وتباسىن اسىراپ وتىر”, – دەيدى مەكتەپ قىزمەتكەرى.
Stan.kz تىلشىسى ورتالىق باسشىسى اياتجان احمەتجان ۇلىنا حابارلاسىپ, ءىستىڭ اق-قاراسىن اجىراتۋ ماقساتىندا پىكىر سۇرادى.
“مەنىڭ قول استىمدا 430-عا جۋىق مۇعالىم بار. ولاردىڭ جالاقىلارى 180 ميلليون تەڭگەگە جۋىقتايدى. ءبىر عانا گۇلنازدىڭ ماسەلەسى ەمەس. ءتىپتى, الدەكىمدەردىڭ قولدان قوزدىرۋى سياقتى. مينيسترلىك بىزگە ميلليونداپ اقشا قارىز. 2023 جىلعى قاراشا ايىنان بەرى وقۋ-اعارتۋ مينيسترلىگى جەكەمەنشىك مەكتەپتەردى “سورلاتىپ” وتىر. كەلىسىمشارت بويىنشا مينيسترلىككە قاراستى قارجى ورتالىعى ليتسەنزيا العان سوڭ, وقۋشى سانى بويىنشا اي سايىن جان باسىنا قارجىلاندىرۋ جۇرگىزىپ, جىلىنا 9 اي قارجى تولەيدى. بۇل قارجىنى بارلىق مەكتەپتەر الادى. كەيدە مينيسترلىك قارجى بەرمەگەن جاعدايدا مۇعالىمدەردىڭ اقشاسىن ءوز قالتامنان دا, دەمەۋشىلەردىڭ كومەگىمەن دە تولەگەن كۇندەر بولعان. ءالى كۇنگە دەيىن رەتتەپ ءجۇرمىن. كوپ جەكە مەكتەپتەر دەمالىس پەن ساۋىقتىرۋدى دا تولەمەيدى. تولىق تولەيتىن ءبىر مەكتەپ بولسا, ول – ءبىزدىڭ مەكتەپ”, – دەپ جاۋاپ بەردى اياتجان احمەتجان ۇلى.
