ايماعامبەتوۆ ايتقانىن ورىندادى: رەابيليتاتسيالىق ورتالىقتاردىڭ قىزمەت ءتاريفى ۇلعايدى

فوتو: اشىق دەرەككوز

ءماجىلىس دەپۋتاتى اسحات ايماعامبەتوۆ Facebook الەۋمەتتىك پاراقشاسىندا الەۋمەتتىك ورتالىقتىڭ ماسەلەسىن كوتەردى, دەپ حابارلادى Qandastar.kz.

دەپۋتات كوكتەمدە ۇلتتىق بالالاردى وڭالتۋ ورتالىعىنا بارىپ, بالالارعا ساپالى رەابيليتاتسيالىق كومەك كورسەتۋ ءۇشىن قارجىلاندىرۋدىڭ جەتىسپەۋشىلىگى ۇلكەن ماسەلە ەكەنىن انىقتاعانىن جازعان.

ورتالىق دارىگەرلەرى جانە ماماندارىمەن كەزدەسۋدە ولاردىڭ كۇندەلىكتى جۇمىستا قانداي قيىندىقتارعا تاپ بولاتىنىن ەگجەي-تەگجەيلى تالقىلاعانىن اتاپ ءوتتى.

– ولاردىڭ ايتقاندارىنىڭ ىشىندە ەڭ وزەكتىسى – بالالاردى تولىقتاي قامتۋ ءۇشىن قاجەتتى قارجىلىق جانە ماتەريالدىق رەسۋرستاردىڭ جەتكىلىكسىزدىگى ەدى. وسى ساپاردان كەيىن ءبىز بۇل ماسەلەگە ەرەكشە نازار اۋدارىپ, دەنساۋلىق ساقتاۋ مينيسترلىگىنىڭ الدىنا قويدىق. مەديتسينالىق قىزمەتتەرگە بولىنەتىن بيۋدجەتتىك تاريفتەردى كوتەرۋدىڭ اسا ماڭىزدى ەكەنى ايدان انىق بولدى. ناتيجەسىندە, ءبىزدىڭ تاباندىلىعىمىز بەن دەنساۋلىق ساقتاۋ مينيسترلىگىمەن بىرلەسكەن جەمىستى جۇمىسىمىزدىڭ ارقاسىندا بۇل ماسەلە شەشىمىن تاپتى. ايتىلدى-ورىندالدى. 1 قازاننان باستاپ, رەابيليتاتسيالىق ورتالىقتار ءۇشىن قىزمەتتەر ءتاريفى 12%-عا ۇلعايدى, – دەپ جازدى دەپۋتات.

بۇل شەشىم بالالاردىڭ وڭالتۋ قىزمەتتەرىنە قول جەتكىزۋ مۇمكىندىگىن ارتتىرىپ, ساپانى جاقسارتۋعا مۇمكىندىك بەرەدى. ەندى ۇلتتىق ورتالىق پەن باسقا دا رەابيليتاتسيالىق مەكەمەلەر قوسىمشا قارجىلاندىرۋعا يە بولىپ, كوبىرەك بالانى ەمدەۋگە جاعداي جاساماق. ال مەديتسينالىق قىزمەتكەرلەر ءوز مىندەتتەرىن تيىمدىرەك اتقارا الادى.

جاعداي قالاي وزگەرەدى? تاريفتەردىڭ ۇلعايۋى جانە قوسىمشا قارجىلاندىرۋ ارقاسىندا ورتالىقتار الداعى ايلاردا كوبىرەك پاتسيەنتتەردى قابىلداپ, كەزەكتەردى قىسقارتا الادى. سونداي-اق, رەابيليتاتسيالىق قىزمەتتەردىڭ ساپاسى دا جاقسارادى. بۇل شارالار بالالارعا قاجەتتى كومەك كورسەتۋدىڭ قولجەتىمدىلىگىن ارتتىرىپ, ولاردىڭ دەنساۋلىعىن نىعايتۋعا وڭ ىقپال ەتەدى.

– ءبىز بالالاردىڭ رەابيليتاتسياسىنا قاتىستى ءالى دە كوپتەگەن ماسەلەلەر بار ەكەنىن بىلەمىز, سوندىقتان بۇل باعىتتاعى جۇمىسىمىزدى جالعاستىرا بەرەمىز, – دەپ تۇيىندەدى ا.ايماعامبەتوۆ.