Aımaǵambetov aýylǵa degen saǵynyshymen bólisti

Májilis depýtaty Ashat Aımaǵambetov balalyq shaǵy qalaı ótkenin aıtty, dep habarlaıdy qandastar.kz

Depýtat Khabar arnasyna bergen suqbatynda bala kezinde ýaqytty qalaı ótkizgenin esine aldy.

Balalyq shaǵym aýylda ótti. Men úshin eń tátti, eń qymbat estelikter balalyq shaǵymmen baılanysty. Eń aldymen aýyldyń jazy, anam pisirgen taba nannyń ıisi. Anam tańerteń sıyr saýǵannan keıin separatormen sút tartatyn. Sonyń qaımaǵyna jańa pisken ystyq nandy tosa qalyp jeıtinbiz. Onyń dámi áli kúnge deıin aýzymda tur, — deıdi Aımaǵambetov.

Ol jazda úıinde qurt ta jasalǵanyn esine aldy.

Qurtty shatyrdyń ústine jaıyp qoıatyn. Shatyrǵa shyǵyp, qurt alyp jeıtinbiz. Oǵan qosa qoı da baǵatynbyz. Qoı baǵý qazir shytyrman oqıǵa sııaqty ǵoı, biraq ol kezde esten ketpeıtin sát edi. Sóıtip qoı kezeginde qoı baqtyq. Keshke mal túgel bolmasa, basqa úıdiń qorasynan qoı izdeıtinbiz. Mine bizdiń balalyq shaǵymyz osylaı ótti, — dedi depýtat telearnaǵa bergen suqbatynda.