ايماعامبەتوۆ ۇبت وتكىزۋ فورماتىن وزگەرتۋدى ۇسىندى

فوتو: Dalanews.kz

قازاقستاندا جاساندى ينتەللەكتتىڭ دامۋىن ەسكەرە وتىرىپ, ۇلتتىق بىرىڭعاي تەستىلەۋدى (ۇبت) وتكىزۋ پروتسەسىن قايتا قاراۋ قاجەت. بۇل تۋرالى ءماجىلىس دەپۋتاتى اسحات ايماعامبەتوۆ مالىمدەدى, دەپ حابارلايدى qandastar.kz

«ۇبت قالاي وزگەرىپ جاتىر? سۇراقتار قالاي وزگەرۋدە? بۇرىنعىداي ناتيجەگە قاراپ باعالاۋ مۇمكىن ەمەس. ChatGPT بار. ۇبت قالاي ترانسفورماتسيالانادى – وكىنىشكە قاراي, بۇل ماسەلە ءالى اشىق كۇيىندە قالىپ وتىر», – دەدى ماجىلىسمەن.

جاڭا ۇسىنىستار

Dalanews.kz جازعانداي,   ايماعامبەتوۆ جوعارى وقۋ ورىندارىندا وقىتىلاتىن مىندەتتى پاندەر ءتىزىمىن كەڭەيتۋدى ۇسىنىپ, فيلوسوفيا مەن قوعامدىق-ساياسي پاندەرگە كوبىرەك ءمان بەرۋ قاجەت ەكەنىن ايتتى.

«سول سياقتى Data Science. دەرەكتەرمەن جۇمىس ىستەي ءبىلۋ كەرەك. مۇمكىن, بۇل دا مىندەتتى پاندەردىڭ ءبىر بولىگى بولۋى ءتيىس. ستاتيستيكامەن جۇمىس – ۇناسىن, ۇناماسىن – بازالىق داعدىعا اينالىپ بارادى», – دەپ تولىقتىردى دەپۋتات.

قازىرگى تاڭدا دەپۋتاتتىڭ ۇسىنىسى تالقىلاۋ كەزەڭىندە.