«Aıtatyn sát keldi»: Astanalyq áıel Perızat Qaırattyń taǵy bir bylyǵyn ashty

Foto: Ásel Omarovanyń jeke muraǵatynan

Elorda turǵyny Ásel Omarova redakııamyzǵa habarlasyp, osydan eki jyl buryn «BIZ BIRGEMIZ» qorynyń atynan ózine Perızat Qaırat shyqqanyn, áıelge páter beriletinin málimdep, úmittendirip qoıǵanyn jetkizdi. Tipti bul “syılyq” sertıfıkat túrinde galokonertte  resmı túrde tabystalǵan eken. Degenmen arada qanshada ýaqyt ótse de, jelide balasymen taksı júrgizip tanylǵan avtoledı ýáde etilgen páterdiń kiltin qolyna ustaı almapty, dep habarlaıdy qandastar.kz Skifnews.kz aqparat portalyna silteme jasap. 

Esterińizde bolsa, 2 jyl buryn bes aılyq qundaqtalǵan sábıin ustap, bir qolymen rýldi basqaryp, taksı qyzmetin atqarǵan astanalyq áıel jeli juldyzyna aınalǵan edi. Onyń áreketi kópti tańǵaldyryp, jelide qyzý talqyǵa tústi. Qazaqstandyqtar biraýyzdan qoldap, Ásel Omarovaǵa 1,7 mıllıon teńge jınap beripti. Osy jaǵdaıdan soń áıelmen Perızat Qaırat baılanysqa shyǵyp, úıine barǵan. Sol kezde otbasyǵa páter syılaýǵa ýáde etken, tipti kóptiń aldynda sertıfıkat tabystaǵan. Biraq sol kúıi úı berilgen joq deıdi.

“Jamandyqqa qımaımyn, degenmen “bardy bar, joqty joq” dep aıtar sát kelgendeı. 2022 jyly qarashada Perızat úıime kelip, “úı tabystaımyz” dep aıtyp ketken edi. Keıin Jańa jyldyq merekege oraı úlken galakonert bolyp, sol jerde sertıfıkat ustatqan. Biraq úı berilmedi”, – dedi astanalyq Ásel Omarova.

Ásel Omarovaǵa belgili bir turǵyn úı kompleksinen úı beriledi dep aıtylǵan. Biraq keıin habarsyz ketti deıdi. Aıtýynsha, ózi habarlasqan kezde “kúnde erteń” dep túrli syltaýmen Áseldi uzaq kúttirip qoıǵan.

“Úmit degen qıyn eken, “áne, mine berip qalar” dep kútip júr edim. Sońǵy ret 4-5 aı buryn habarlastyq, sol kezde “1-2 aıdan soń beriledi” dedi. Biraq qaıtadan únsiz qaldy”, – dedi ol.

Ásel balalarymen áli de páter jaldap turady.