ايتەكە بي كەسەنەسى جوندەلىپ جاتىر

بيىل وزبەكستاننىڭ ناۋاي وبلىسىندا ايتەكە ءبيدىڭ 380 جىلدىعى اتاپ وتىلەدى. ونىڭ اياسىندا بابا رۋحىنا تاعزىم ەتىلىپ, اس بەرىلەدى. ەسىمىن ەل جادىندا قايتا جاڭعىرتۋ ماقساتىندا رۋحاني-مادەني ءىسا-شارالار ۇيىمداستىرۋ دا كوزدەلگەن.

بۇعان قازاقستاندىق ونەرپازدار دا اتسالىسادى. بابا ۇرپاقتارى  حالىقارالىق اقىندار ايتىسىن وتكىزۋگە نيەتتى. تاۋەلىباي حالقى بابانىڭ زيرات باسىن كۇتىپ-باپتاپ وتىر. كوكتەم شىعا كەسەنە ماڭىندا اباتتاندىرۋ جۇمىستارى باستالعان. ال مۋزەيدە كۇردەلى جوندەۋ ءجۇرىپ جاتىر. جالپى ايتەكە بي كەشەنى 2009 جىلى بوي كوتەردى. وعان دەيىن بابانىڭ ماڭگىلىك مەكەن تاپقان جەرى كوپكە بەيمالىم بولىپ كەلدى. بۇل ءىستىڭ باسى-قاسىندا بەلگىلى ساياسي قايراتكەرلەر مەن كاسىپكەرلەر ءجۇردى.

كونە زامان ۇلگىسىندەگى زيارات ورنىندا جىل سايىن مامىر ايىندا اس بەرىلەدى. كىشى ءجۇز ءبيىنىڭ قازاقستانداعى ۇرپاقتارى يگى ءۇردىستى ۇزگەن ەمەس. تورەحان نارىنبەتوۆ ناۋاي وبلىسى قازاق مادەني ورتالىعىنىڭ توراعاسى: — ءناسىپ قىلسا, 380 جىلدىقتى حالىقارالىق دارەجەدە وتكىزبەكشىمىز. وتكەن جىلى ءبىز قىزىلورداعا بارىپ, ايتەكەنىڭ ۇلكەن بالاسى وتەباستىڭ دا اسىن بەرگەنبىز. سول كەزدە تۇركسوي ۇيىمى وكىلدەرىمەن كەزدەستىك. حالىقارالىق ايتىس وتكىزەمىز. 16-شى مامىردا بابا باسىندا اس بەرىلەدى. بۇل شارالاردىڭ ءبارى جەرگىلىكتى اكىمدىكپەن كەلىسىپ وتكىزىلەدى. وبلىس اكىمى حابار الىپ, بىزدەن نە جاردەم دەپ جاتىر. كوگالداندىرۋ ىستەرىنە جاردەم بەرىپ جاتىر. كەسەنەدەگى يمام-مولدالار «سەيتقۇل اۋليە ايتەكە بي» قورى تاراپىنان قارجىلاي كومەك الىپ تۇرادى. زيارات ەتۋشىلەر اراسىندا وزبەك, قاراقالپاق ۇلتىنىڭ وكىلدەرى دە بار. ول تۇسىنىكتى دە. سەبەبى ايتەكە  بىرنەشە ۇلت پەن ۇلىسقا قورعان بولعان. 21 جاسىندا-اق ەلدىك ىستەرگە ارالاسىپ, بۇقارا مەن سامارقان توڭىرەگىندەگى حالىقتىڭ باس ءبيى بولىپ سايلانعان. ءدىلشود حودجاەۆ, ناۋاي وبلىسى تۋريزم باسقارماسىنىڭ باسشىسى: — ايتەكە بي زيارات كەشەنىنە جىل سايىن 7-8 مىڭ شەتەلدىك كەلەدى. سونىڭ ارقاسىندا نۇراتا اۋدانى تانىمال باعىتقا اينالدى.

مۇندا ساياحاتتاۋشىلارعا قىزمەت كورسەتۋ ءىسى جاقسى دامىعان. ايتەكە بي كەسەنەسى مادەني ميرا نىسانى سانالادى. وعان قوسا, «شوشما» كەشەنى دە بار. بيىل ءبىز وسى جەرلەردە ساياحاتشىلاردىڭ ۇلكەن بولىگىن  قابىلداۋدى كوزدەپ وتىرمىز. ءبىر عانا ايتەكە ءبيدىڭ 380 جىلدىعىندا قازاقستاننان 2 مىڭ مەيمان كەلەدى دەگەن بولجام بار. ودان بولەك ەل ىشىندەگى ساياحاتشىلار كەلەدى.  ۇيىمداستىرۋشىلار ءىس-شاراعا تۇركى مەملەكەتتەرى جانە حالىقارالىق ۇيىمداردان مارتەبەلى مەيماندار شاقىرماق. ايتەكە ءبيدىڭ ءومىر جولىن كەلەشەك ۇرپاققا ناسيحاتتايتىن عىلىمي كەڭەس وتكىزۋ جوسپارلانىپتى. قىزىلوردا مەن ناۋاي وبلىستارى مادەني ىنتىماقتاستىعىن جالعاستىرادى. سونىڭ اياسىندا سىربويىلىق ونەرپازدار نۇراتا جەرىندەگى بابا ەسىمىن ۇلىقتاۋ ىسىنە اتسالىسادى. كەلۋشىلەر زياراتتان سوڭ كىلەڭ قازاق قونىستانعان كەنيمەح اۋدانىنا بارىپ, وڭىرلەر اراسىنداعى رۋحاني ءھام مادەني بايلانىستى نىعايتۋعا كۇش سالماق.