«ايتقانىمنان شىقپاۋىڭ كەرەك دەدى»: گۇلميرا ساتىبالدىنىڭ ءىسى بويىنشا كۋاگەر ءسوز الدى

گۇلميرا ساتىبالدىعا قاتىستى سوت پروتسەسىندە جابىرلەنۋشى اباي جۇنىسوۆكە 12 جىل جۇرگىزۋشى بولىپ ىستەگەن كۋا ەرنار مۇرات جاۋاپ بەردى,-دەپ حابارلايدى Qandastar.kz

2019 جىلدىڭ 13 اقپانىندا كۋاگەر ەرنار مۇرات ءىسساپاردا بولعان. ال ورالعان كەزدە جابىرلەنۋشى اباي ءجۇنىسوۆتىڭ ۇيىنە بارعان. بۇل كەزدە ول ۇيقاماقتا بولعان. «ۇيدە ازاماتتىق جانە سپورتتىق كيىم كيگەن بەيتانىس ادامدار بولدى. مەنى باتىرشاەۆ قارسى الدى دا ء(مادي – سوتتالۋشى – رەد. ەسكەرتپەسى), «ايتقانىمنان شىقپايتىن بول» دەپ بۇيىردى جانە ەندى گۇلميرا ساتىبالدى ەكەۋى مەنىڭ ديرەكتورىم بولاتىنىن ايتتى. ادامداردى باتىرشاەۆتىڭ رۇقساتىمەن ۇيگە كىرگىزىپ, شىعارۋعا رۇقسات ەتەتىن. بىراق مەن اباي ءجۇنىسوۆتىڭ جۇبايى رايانىڭ دا ىسىنە ارالاسىپ جۇرگەندىكتەن, مەن وعان حابارلاستىم. بىراق ول قاجەت كەزدە حابارلاساتىنىن ايتىپ, بۇل ۇيگە كەلمە دەدى», – دەپ حابارلادى كۋاگەر.

ەسكە سالا كەتەيىك, جابىرلەنۋشى اباي ءجۇنىسوۆتىڭ ايەلى سوتتالۋشى گۇلميرا ساتىبالدىنىڭ تۋىسى. سونداي-اق كۋاگەردىڭ ايتۋىنشا, سوتتالۋشى ونىمەن بايلانىسقا شىققان.

«ماعان گۇلميرا ساتىبالدى حابارلاسىپ, استاناعا «قازگرادستروي» كومپانياسىنا بارۋ كەرەكتىگىمدى قوقان-لوقى كورسەتە بۇيىرا ايتتى. ال سودان كەيىن حاتشى حابارلاسىپ, ماعان بيلەت العاندارىن ايتتى. ءسويتىپ, 18-ءى كۇنى استاناعا ۇشتىم, ول جاقتا مەنى جۇرگىزۋشى قارسى الىپ, كەڭسەگە اپاردى.

كومپانيانىڭ 60 پايىز اكتسياسى مەنىڭ اتىما تىركەلدى. مۇنىڭ 30 پايىزى – اباي جۇنىسوۆتىكى جانە 30 پايىزى گۇلميرا ساتىبالدىعا تيەسىلى. ولاردى ماعان وسىعان دەيىن اباي ءجۇنىسوۆتىڭ ءوتىنىشى بويىنشا جازدى. ول مەنىڭ سەنىمدى ادام ەكەنىمدى ايتىپ, اكتسيالاردى ماعان بەرۋدى ءوتىندى. 18-ءى كۇنى گۇلميرا ساتىبالدى وتىرعان كەڭسەگە كەلدىم. ول ماعان دورەكى داۋىسپەن اقشانى باستىعىم ۇرلاپ كەتكەنىن, سوندىقتان مەن اكتسيانىڭ 60 پايىزىن ءوزى اتاعان ادامعا جازىپ بەرۋىم كەرەكتىگىن ايتا باستادى. «اباي ءجۇنىسوۆ بۇل تۋرالى بىلە مە?» دەگەن سۇراققا گۇلميرا ساتىبالدى «اباي ەندى ەشكىم ەمەس, ءبارى مەنىڭ بۇيرىعىممەن بولادى» دەپ جاۋاپ بەردى. جاقىندا اباي تۇرمەگە تۇسەدى, ەگەر بۇيىرعانىمدى ورىنداماساڭ, ارتىنان باراسىڭ دەپ قورقىتتى», – دەدى كۋاگەر.

وسىدان سوڭ نوتاريۋس پەن قاسىمباەۆ كەلىپ, وعان كۋاگەر ءوز ۇلەسىن اۋدارىپ, قول قويادى. الايدا ورنىنا ەشتەڭە المايدى. كۋاگەردەن قۇقىق قورعاۋ ورگاندارىنا نە بولىپ جاتقانىن حابارلاۋعا تىرىستىڭىز با دەپ سۇرالدى. «بۇل تۋرالى ابايدان سۇراپ ەدىم, ول ءبىرىنشى كۇنى-اق ءوزىنىڭ, وتباسىنىڭ, بالا-شاعاسىنىڭ اماندىعى ءۇشىن ەشقايدا حابارلاسپاۋىمدى ءوتىندى. مەنىڭ دە گۇلميرا ساتىبالدىنى تانيتىنىما كوپ بولعان, ودان ءوزىم دە قورقاتىنمىن. ويتكەنى ونىڭ قايرات ساتىبالدانىڭ ايەلى جانە نازارباەۆتىڭ كەلىنى ەكەنىن بىلەتىنمىن, سوندىقتان قۇقىق قورعاۋ ورگاندارىنا حابارلاسۋدىڭ پايداسى جوق ەكەنىن ءتۇسىندىم», – دەپ ءتۇسىندىردى كۋاگەر. بۇدان كەيىن سوتتالۋشىلار سۇراق قويۋعا مۇمكىندىك الدى. گۇلميرا ساتىبالدى كۋاگەرگە كومپانياداعى 30 پايىزدىق ۇلەسىن بەرۋدى سۇراعان جانە وعان جازىپ بەرگەن كەزدى ەسىنە ءتۇسىرۋىن سۇرادى. ايىپتالۋشى ءوزىنىڭ كۋاگەرمەن جاي عانا امانداسقانى بولماسا, وعان ەشقاشان مۇنداي ءوتىنىش ايتاپعانىن اتاپ ءوتتى. «ەسىڭىزگە ءتۇسىرىڭىز. بۇل ماڭىزدى. مۇندا مەنىڭ تاعدىرىم شەشىلۋدە. ماعان 194-باپ (قر قىلمىستىق كودەكسىنىڭ – رەد. ەسكەرت.) بويىنشا ايىپ تاعىلىپ وتىر – بۇل دەگەنىمىز م ۇلىكتى تاركىلەۋمەن جەتى جىلدان 13 جىلعا دەيىن باس بوستاندىعىمنان ايىرىلۋ. ال ءسىز بولساڭىز مەنىڭ سۇراق قويىپ جاتقانىما نارازىلىق بىلدىرەسىز بە? ءسىز ايتقاندا مەن سابىرمەن تىڭداپ, ءوزىڭىز قالاعانداي ايتۋىڭىزعا رۇقسات ەتتىم, قۇرمەتتىلەر. سىزدەر مەنى ەرەكشە اۋىر ايىپتاپ وتىرسىزدار», – دەدى گۇلميرا ساتىبالدى. سۇراقتارعا جاۋاپ بەرە وتىرىپ, كۋاگەر ەشكىمنىڭ ۇلەسىنە جەكە تالاپ قويمايتىنىن ءتۇسىندىردى. تەك 30 پايىزدىق ۇلەستىڭ اباي جۇنىسوۆكە قايتارىلۋىن قالايتىنىن ايتتى. ال گۇلميرا ساتىبالدىعا جەكە ارىز-تالابى جوق ەكەنىن دە ايتۋدى ۇمىتپادى.