ايىپتالۋشى شەرزاتتىڭ اناسىن دا ولتىرەمىن دەپ قورقىتقان

فوتو:

تالعار قالاسىندا شەرزات بولاتتىڭ قازاسىنا قاتىستى ءىس بويىنشا ءوتىپ جاتقان سوت وتىرىسىندا مارقۇمنىڭ اناسى گۇلبارا بيشىمبيەۆا كۋالىك بەردى, دەپ حابارلايدى  qandastar.kz  Skifnews.kz اقپاراتتىق پورتالىنا سىلتەمە جاساپ حابارلايدى.

گۇلبارا بيشىمبيەۆانىڭ ايتۋىنشا, قايعىلى وقيعا بولعان ءتۇنى كۇيەۋى قارجاۋباي قوڭىراۋ شالىپ, ۇلى شەرزاتتىڭ بىرەۋمەن جانجالعا تۇسكەنىن حابارلاعان. ول ەكىنشى ۇلى — نۇرقاناتتى وياتىپ, دۇكەن جاققا جىبەرۋدى سۇراعان.

«نۇرقاناتتى وياتتىق, ول كولىكپەن كەتىپ قالدى. قارجاۋباي قايتا حابارلاسىپ, ء“بارى جاقسى, شەشىپ جاتىرمىز” دەدى. بىراق ۋايىمداپ, ەنەممەن بىرگە ءبىز دە شىقتىق. تاكسيمەن “قاماجاي” دۇكەنىنە جەتكەندە, 10-15 ادام جينالىپ قالعانىن كوردىك. ەكى قىز دا بار ەكەن. سول ساتتە بىرەۋى “دەلايتە!” دەپ ايقاي سالدى», – دەدى مارقۇمنىڭ اناسى.

گۇلبارانىڭ ايتۋىنشا, شەرزات العاش بەتىنەن ۇرىلىپ, كەيىن جاۋاپ سوققى بەرگەننەن كەيىن جاعداي ۋشىققان. قارسى تاراپ بىردەن جابىلا كەتىپ, ۇرىپ-سوعۋ باستالعان.

«ابزال مەن نۇربول مەنى ۇستاپ جىبەرمەي قويدى. “بالاما تيمەڭدەرشى, اناسىمىن” دەپ جالىندىم. سوندا ابزال “اۋزىڭدى جاپ, سەنى دە ولتىرەمىن” دەپ قورقىتتى. ەكى قىزدان “جەدەل جاردەم مەن پوليتسيا شاقىرىڭدارشى” دەپ سۇرادىم, بىراق ولار ەشتەڭە ىستەگەن جوق», – دەدى اناسى سوتتا.

ول 7-8 ادام شەرزاتقا جابىلعانىن, بالاسىنىڭ شەگىنىپ بارىپ قۇلاعان ساتتە دەنەسىنەن قان اعىپ جاتقانىن بايقاعانىن ايتادى. سول كەزدە ونىڭ پىشاق جاراقاتىن العانىن تۇسىنگەن.

«نۇرقياستىڭ قولىندا مىلتىق بولدى. نۇرقاناتتى تەپكىلەپ بولعان سوڭ, نۇرقياس شەرزاتقا قايتا بەت الىپ, ونى باسى مەن جەلكەسىنەن 3-4 رەت ۇردى. اراشا تۇسپەك بولدىم, قولىمدى توستىم. بىراق ول مەنى دە ۇرىپ جىبەردى», – دەيدى بيشىمبيەۆا.

سوتتا ايتىلعان دەرەكتەرگە سۇيەنسەك, سول ءتۇنى شابۋىل جاساعاندار پىشاق, مىلتىق جانە بوتەلكە سىندى قارۋلارمەن قارۋلانعان. شەرزاتتىڭ اكەسى قارجاۋباي دا سوققىعا جىعىلىپ, وعان بوتەلكەمەن ۇرعان, ارتىنان پىشاق سالىنعان.

سوت پروتسەسى جالعاسىپ جاتىر.