«Aqaý emes, tabıǵı qubylys»: LRT relsterin nelikten tat basqany túsindirildi

Foto: instagram.com/cts_kz

City Transportation Systems kompanııasy ókilderi jańa tóselgen LRT relsin nege tot basyp ketkenin túsindirdi, dep jazdy qandastar.kz

Bul týraly Stan.kz aqparat agenttigi habarlaıdy.

Kompanııa málimetinshe, qurylys barysynda quramynda temir mólsheri joǵary kómirtekti nemese tómen legırlengen bolattan jasalǵan relster qoldanylǵan.

«Temir ylǵal men aýa áserinen totyǵady, sonyń saldarynan betinde tat paıda bolady.

Turmystyq nemese avtokólikke arnalǵan metall buıymdardan aıyrmashylyǵy – relsterge boıaý nemese lak jaǵylmaıdy. Bul tehnıkalyq talaptarǵa baılanysty: boıaý qozǵalys júktemesiniń áserinen tez óshirilip qalady, sondaı-aq dóńgelekterdiń ilinisine kedergi keltirýi múmkin jáne dánekerleý jumystaryna keri áserin tıgizedi», – delingen kompanııa habarlamasynda.

Mamandardyń aıtýynsha, betki tat relstiń beriktigine jáne paıdalaný sapasyna áser etpeıtin kórinedi. Poıyzdar júre bastaǵan soń dóńgelekter qozǵalys kezinde rels betin ózdiginen tazartady eken.

«Barlyq rels jańa jáne arnaıy LRT jobasy úshin 2025 jyly shyǵarylǵan. Jańa relsterde tattyń paıda bolýy – aqaý emes, tabıǵı qubylys. Bul – rels bolatyna tán standartty erekshelik, ol ınfraqurylymnyń qaýipsizdigi men beriktigine áser etpeıdi», – delingen túsindirmede.

Kompanııa ókilderi rels tóseý jumystary bekitilgen kestege saı júrgizilip jatqanyn málimdedi. Joldyń ústińgi qurylysy 2025 jylǵy tamyz aıynyń sońynda aıaqtalmaq. 10 shildedegi jaǵdaı boıynsha, jalpy uzyndyǵy 22,4 shaqyrym bolatyn joldyń ústińgi bóliginiń 18 shaqyrymy tóselgen.

Eske salsaq, buǵan deıin Astanada LRT-nyń alǵashqy vagondary relske qoıylǵanyn jazǵan edik. Vagondar stanııada 2025 jyldyń qyrkúıegine josparlanǵan synaqtyq iske qosýǵa deıin turady.