«Ákem kıimin jınap ketip qalǵan»: Kishkentaı qyzdyń áńgimesi kópshilikti jylatty

Foto: skrınshot

Áleýmettik jelide ákesin saǵynǵan kishkentaı Aısha esimdi qyzdyń vıdeosy taraldy. Beıtanys kásipker kishkentaı qyzben sóılesip, mektepke daıyndyǵy jóninde suraıdy. Keıinnen Aıshany kıindirip, úıine azyq-túlik jetkizip beredi, dep habarlaıdy  qandastar.kz  Qaz365.kz-ke silteme jasap.

Aısha esimdi kishkentaı qyzdyń aıtýynsha, olardy ákesi tastap ketken.

«Ákemiz bizben birge turmaıdy. Ol kıimin jınap ketip qalǵan. Sizdiń ıisińiz meniń ákemniń ıisindeı eken. 2-synypqa baramyn. Mektep formasy men qalam-dápter almadyq», – deıdi kishkentaı qyz.

Ol eden jýatyn anasyna kómektesetinin atap ótti.

«Kópqabatty úıdiń 18 qabatynan 7 qabatyna deıin sypyramyn. Anama kómektesemin. Ol eden jýady», – deıdi Aısha.

Kásipker jigit kishkentaı qyz ben onyń aǵasyn jańa oqý jylyna daıyndap, kerek-jaraqtyń barlyǵyn alyp berdi. Tipti, telefonyna deıin alyp bergen. Sondaı-aq úıine qajetti azyq-túlikti jetkizip berdi. Kishkentaı Aıshanyń kóńil-kúıin kóterip, qonjyq pen gúl syılady.

«Mektepke de daıyn bolmadyq. Sabaqtyń bastalýyna 1-2 kún qalyp edi. Sondyqtan osyndaı kómekterińizge kóp rahmet. Alla razy bolsyn», – dedi Aıshanyń anasy.