جاڭالىقتار
«اكەم ءنومىرىمدى بازادان جاسىرىپ قويعان»: الماتىلىق قىز پوليتسيانىڭ وزىنە ايىپپۇل سالا المايتىنىن ايتىپ ماقتاندى
فوتو: اشىق دەرەككوز
الماتىلىق بويجەتكەن اكەسىنىڭ ءوزىنىڭ كولىك ءنومىرىن مەملەكەتتىك دەرەكتەر بازاسىنان جاسىرىپ قويعانىن مالىمدەدى, دەپ جازدى qandastar.kz
بۇل تۋرالى Stan.kz اقپارات اگەنتتىگى حابارلايدى.
18 جاستاعى قىز TikTok-تا قىمبات كولىگىن كورسەتىپ, VIP مەملەكەتتىك نومىرىمەن ماقتانعان.
«مەنى جول پوليتسياسى توقتاتقاندا, «مەنىڭ مەملەكەتتىك ءنومىرىمدى پلانشەتكە ەنگىزىپ تەكسەرىپ كورىڭىزدەر, اكەم ونى بازادان جاسىرىپ قويعان دەپ ايتامىن», – دەيدى الماتىلىق قىز جەلىدەگى جازباسىندا.
جەلىدەگى اقپاراتقا قاتىستى الماتى قالالىق پوليتسيا دەپارتامەنتى مالىمدەمە جاسادى. پوليتسيانىڭ مالىمەتىنشە, الەۋمەتتىك جەلىلەردى مونيتورينگتەۋ بارىسىندا Lexus ماركالى اۆتوكولىك جۇرگىزۋشىسىنىڭ جول قوزعالىسى ەرەجەلەرىن بۇزعانى انىقتالعان.
«بۇل فاكتى بويىنشا تەكسەرۋ باستالدى. جۇرگىزۋشىنىڭ 2006 جىلى تۋعان م ەسىمدى ازاماتشا ەكەنى انىقتالدى. ول «ۆ» كاتەگورياسى بويىنشا جۇرگىزۋشى كۋالىگىنە يە. جول قوزعالىسى ەرەجەلەرىن بۇزۋ فاكتىسى بويىنشا شارالار قابىلدانادى», – دەلىنگەن پوليتسيا حابارلاماسىندا.
پوليتسيا اتالمىش جۇرگىزۋشىگە قاۋىپسىزدىك بەلدىگىن پايدالانباعانى ءۇشىن اكىمشىلىك حاتتاما تولتىرىلعانىن اتاپ ءوتتى.
