«اكەسى – ەكس-دەپۋتات»: الماتىدا كۇزەتشىنى تاپتاپ ولتىرگەن ەر ادامعا قاتىستى تەرگەۋ توقتاتىلدى

كوللاج: massaget.kz

الماتىدا «مەركۋر تاۋەرس» تۇرعىن ءۇيىنىڭ كۇزەتشىسىن كولىگىمەن بىرنەشە رەت قاتىگەزدىكپەن قاعىپ ولتىرگەن ەكس-دەپۋتاتتىڭ بالاسىنىڭ ىسىنە قاتىستى جاڭا دەرەك بەلگىلى بولدى, – دەپ حابارلايدى qandastar.kz  Skifnews.kz اقپارات پورتالىنا سىلتەمە جاساپ.

الماتى پروكۋراتۋراسى Tenginews.kz رەداكتسياسىنا بۇل ءىس بويىنشا سوتقا دەيىنگى تەرگەۋ 29 ناۋرىزدا باستالعانىن حابارلاعان.

«قازىرگى ۋاقىتتا قىلمىستىق قۋدالاۋ ورگانى قىلمىستىق ءىس جۇرگىزۋ كودەكسىنىڭ 45-بابىنىڭ 7-بولىگىنىڭ 4-تارماعىنىڭ نەگىزىندە سوتقا دەيىنگى تەرگەپ-تەكسەرۋدى توقتاتۋ تۋرالى شەشىم قابىلدادى», – دەيدى ۆەدومستۆو وكىلدەرى.

بۇل باپتا سوتقا دەيىنگى تەرگەپ-تەكسەرۋ مەرزىمى زاڭدا بەلگىلەنگەن تارتىپپەن كۋالاندىرىلعان كۇدىكتىنىڭ, ايىپتالۋشىنىڭ پسيحيكاسىنىڭ ۋاقىتشا بۇزىلۋى نەمەسە وزگە دە اۋىر سىرقاتى كەزىندە توقتاتىلادى دەپ كورسەتىلگەن.

ەسكە سالايىق, جانتۇرشىگەرلىك وقيعا بيىل ناۋرىز ايىندا بولعان ەدى. الماتىداعى ەليتالى ءۇيدىڭ تۇرعىنى كۇزەتشىنى اسقان جاۋىزدىقپەن ولتىرگەن.