اكەسىنىڭ ۋادەسىن ورىندادىم: اناسى 5 سىنىپتاعى ۇلىنا تەلەفوندى قيىندىقپەن اپەرگەنىن ايتتى

فوتو: اشىق دەرەككوز

Instagram جەلىسىندە «قينالعان» انانىڭ قالدىرعان پىكىرى كوپشىلىكتى ويلاندىرىپ قويدى, دەپ حابارلادى Qandastar.kz. پىكىر كاسپي دۇكەنىنىڭ پلاتفورماسىندا جازىلعان. وندا اناسى 5 سىنىپتا وقيتىن ۇلىنا تەلەفوندى قيىندىقپەن اپەرگەنىن جازعان.

– «5-سىنىپتاعى ۇلىما اپەردىم, سىنىپتاستارىنىڭ بارىندە بار ەكەن. اكەسى ءتىرى كەزىندە 5-سىنىپتا اپەرەم دەۋشى ەدى. ول بىلتىر, ياعني ۇلىم 4-سىنىپ وقىپ جۇرگەندە قايتىس بولدى. ۇلىممەن سىرلاسىپ وتىرعانىمدا, پاپام ءتىرى بولعاندا تەلەفون اپەرەر ەدى دەپ قالدى. وسىلايشا كاسپي-مەن ءبولىپ تولەۋگە 3 بالاما اپەردىم. ايىنا 8350 تەڭگەدەن تولەيمىن. اللا قۋات بەرسىن, قۇتىلارمىن, – دەپ قالدىرعان.

جەلى قولدانۋشىلارى قامىققان انانىڭ نومەرىن تاۋىپ, نەسيەسىن جاۋىپ بەرۋگە نيەتتى ەكەنىن جەتكىزگەن. «بالاسى ءۇشىن بارىن بەرەتىن انالارعا كۇش-قۋات بەرسىن», «كاسپي ماگازين ءبىر جاقسىلىق جاساپ, نەسيەسىن كەشىرەدى دەگەنگە سەنىپ وتىرمىن», «نومەرىن قالاي تابۋعا بولادى, نەسيەسىن وتەپ بەرسەك» دەگەن پىكىرلەر كوپ.