«Aqıqat pa? Jala ma?»: Air Astana ushqyshynyń qorǵaýshylary óz dálelderin jarııalady

Foto: orda kz

Qyz zorlady dep aıyptalǵan ushqyshtyń isi áli júrip jatyr. Bul joly onyń týystary men qorǵaýshysy óz nusqasyn málimdedi. Zorlyq jasady dep aıyp taǵylǵan ushqyshtyń isi ózgeshe arnaǵa aýysty, dep jazdy qandastar.kz

Naýryz aıynda Orda.kz jábirlenýshiniń aıtqanyn jarııalaǵan bolatyn. Biz sol kezde kúdikti azamatqa habarlasqan edik, alaıda ol sol kezde pikir bildirýden bas tartty. Endi kúdikti tarap óz nusqasyn usyndy.

Eske sala keteıik, jábirlenýshi (alǵashqy maqalada biz ony Juldyz dep atadyq, sol búrkenshik atpen ataı beremiz) óz sózinde  mergender qaýymdastyǵynyń múshesi ekenin, bul sport túrimen bes jyldan astam ýaqyt aınalysatynyn aıtqan edi. Ol Qonaev qalasynyń mańyndaǵy mergenderge arnalǵan klýbta jattyqqan. 2024 jyldyń 6 qazanynda bir jattyǵýdan keıin Almatyǵa barýy kerek bolyp, bapker klýb músheleriniń birinen Juldyzdy jetkizip salýdy ótingen. Qyzdyń aıtýynsha, qalaǵa kelgen soń, er adam telefon qýattaǵyshyn alý kerek ekenin aıtyp, ony páterine kirgizýge kóndirgen. Onyń sózine qarasaq, sol jerde ol Juldyzdy erkinen tys, zorlaǵan kórinedi. Al endi kúdikti bolyp otyrǵan taraptyń jaýaby múlde basqasha bolyp otyr.

Ushqyshqa burynǵy súıiktisi arqyly shyqqan

Ushqyshtyń qaryndasy Elvıra Abdrahmanovanyń aıtýynsha, Juldyz bul oqıǵa bolmas buryn, 2024 jyldyń tamyzynda baýyrynyń burynǵy súıiktisi Nadejdamen aralasqan:

«Juldyz áleýmettik jelide atys jattyqtyrýshysy Nadejdaǵa (aty ózgertildi), ıaǵnı baýyrymnyń burynǵy qyzyna jazylǵan. Habarlamalarynda ol atys sporty qymbat pa dep suraǵan, klýbqa qalaı kirýge bolady dep qyzyqty. Nadejdaǵa súısinip, maqtap jazdy. Juldyz klýbta jattyǵýdy 2024 jyldyń tamyz aıynyń sońynda bastaǵan. Jeke tanysý kezinde sóılesip otyryp, Nadejda jigitiniń ushqysh ekenin aıtyp qalǵan», – deıdi Abdrahmanova.

Keıinirek baspasóz máslıhatyn uıymdastyrýshylar Nadejdamen bolǵan áńgimeniń aýdıojazbasyn qosyp qoıdy. Aýdıojazbada ushqyshtyń burynǵy qyzy jańa tanysyna tek atys klýby týraly emes, jeke ómiri jaıly da baıandaǵany estiledi. Atap aıtqanda, ol Juldyzǵa jigiti týraly, onyń jetistikteri jaıly aıtqan. Ol tek kásibı mergen ǵana emes, sonymen qatar belgili áýe kompanııasynda jas komandır-ushqysh eken. Juldyz olardyń jubyn «Mıster men mıssıs Smıt» fılmindegi keıipkerlermen salystyrady.

Olar jup sııaqty kórindi

Elvıra Abdrahmanova óziniń baýyry qylmystyq iske ilikken sol, jaıttardy egjeı-tegjeıine deıin baıandady:

«Ol kúni atys klýbynda meniń baýyrymnan buryn tanymaıtyn bir Juldyz degen qyzdy Almatyǵa aparyp tastaýdy suraǵan. Olar buǵan deıin tanys bolmaǵan, biraq sóılese kele qyz onyń dál sol ushqysh Nadejdanyń burynǵy jigiti ekenin bilgeni anyqtaldy», — deıdi qaryndasy.

Elvıranyń aıtýynsha, Juldyz sol tanysqan sátten bastap, jol boıy baýyryna ashyq túrde «qylymsyp, kóz salyp, qylyq kórsetken»:

«Ol tipti baýyrymnyń shalbaryna qolyn salyp, jynys múshesin ustaǵan. Anaıy ázilder aıtqan. Qyzdyń yqylasyn baıqaǵan soń, baýyrym oǵan birge túski as ishýge barýdy usynǵan. Biraq meıramhanaǵa barar aldynda jattyǵýdan keıin dýshqa túsip, kıim aýystyrý úshin úıge soǵatynyn aıtqan», — dedi Elvıra.

Elvıra sózin dáleldeý úshin baýyrynyń páteri ornalasqan turǵyn úı keshenindegi syrtqy baqylaý kameralarynan alynǵan beınejazbany kórsetti. Onda kúdikti men Juldyz otyrǵan kóliktiń keshenge kelgeni, qyzdyń kólikten túsip, jigit kólikti turaqqa qoıǵansha kútkeni túsirilgen. Keıin ekeýi qol ustasyp, aýlany birge kesip ótedi.

«Mine, saǵat 15:45-te olar onyń úıine — turǵyn úı keshenine kelgenin kórip otyrsyzdar. Kameralardan baýyrymnyń kólikti qalaı turaqqa qoıǵany anyq kórinedi. Qarańyzdar, olardyń tanysqanyna bir saǵat qana bolsa da, qushaqtasyp tur. Qyz kúlimdep, arqasymen oǵan súıenip tur. Keıin ekeýi qol ustasyp ketip barady, qyz oǵan qarap kúlimdeıdi, júrisi erkin. Olar romantıkalyq qarym-qatynastaǵy jup sııaqty kórinedi. Esh jerde qorqynysh, zorlyq ne qysym baıqalmaıdy», — dedi Elvıra Abdrahmanova.

Al Juldyz bolsa, kúdiktiniń oǵan «meni geı dep oılamas úshin, tanystarym kórip qalsa, qolymnan ustap júr» dep ótingenin aıtqan edi.

Osydan keıin Elvıra Abdrahmanova baýyrynyń páteriniń maketin kórsetti. Onyń aıtýynsha, bul maket Juldyzdyń zorlyq týraly aıtqandary shyndyqqa janaspaıtynyn dáleldeı alady. Ushqyshtyń qaryndasy — sáýletshi, sol sebepti páterdiń jobasy men ishki qurylymyn ózi ázirlegen, barlyq erekshelikterin jaqsy biledi.

Onyń aıtýynsha, baýyry men qyz páterge kirgen kezde dabyl júıesi iske qosylýy kerek edi. Ony óshirý úshin bólmege tez kirip, terezeniń janyndaǵy qurylǵyǵa 40 sekýnd ishinde kod engizý qajet. Al bul úshin esik jabyq bolýy kerek. Juldyz bolsa, óz sózinde bul týraly múlde aıtpaǵan, tek ushqysh ony ishke kirýge úgittegenin, keıin esikti qulyptap, qol jýyp ketkenin aıtqan.

«Shyn máninde, dabyldy óshirý úshin ol (Juldyz) ne birden ishke kirýi kerek edi, ne syrtta qalyp, esik jabyq bolýy tıis edi. Eki jaǵdaıda da eger ol páterge kelgenin bilip qoryqqan bolsa, jaı ǵana ketip qalýǵa múmkindigi bolǵan», — deıdi ushqyshtyń qorǵaýshysy.

Qorǵaýshy taǵy bir dálel retinde eger shynymen ushqysh qyzdy kúshtep kirgizip, ol qarsylasqan bolsa, denesinde kógergen izder nemese jaraqat bolýy keregin aıtty. Alaıda, onyń aıtýynsha, ondaı belgiler bolmaǵan.

Sonymen qatar, Juldyz óz sózinde qatty aıqaılaǵanyn aıtqan. Alaıda Elvıra Abdrahmanovanyń aıtýynsha, jeksenbi kúni, tústen keıin kórshilerdiń biri qyzdyń aıqaıyn estıtin edi, biraq ondaı kýáger tabylmaǵan.

«Ol birneshe ret kómek surap, aıqaılaǵanyn, al baýyrym oǵan daýys kótergenin aıtty. Alaıda bul jeksenbi kúni boldy. Iaǵnı, keshki ýaqyt, kórshilerdiń bári úıde bolatyn sát. Bul páterlerde dybysty oqshaýlaý nashar. Aıqaı men arpalys dybystaryn mindetti túrde bireý estýi kerek edi», — dedi ol.

Ushqyshtyń qaryndasy men advokaty Juldyzdyń denesinde eshqandaı jaraqat bolmaǵanyn sot-medıınalyq saraptama dáleldedi dep otyr.

«Jynys múshelerinen de zorlyq belgileri tabylmady. Tipti, ol baýyrymnyń meni tunshyqtyrdy degen sózine qaramastan, moınynda da eshbir iz bolmaǵan», — dedi Abdrahmanova.

«Syılyq ekenimdi túsindiń ǵoı»

Ushqyshtyń qaryndasynyń aıtýynsha, jynystyq emeýrindi qyz bastaǵan, al janjal onyń aqsha jónindegi astarly sózderinen keıin bolǵan:

«Shyn máninde ne boldy? Páterde Juldyz ózin erkin ustady, jaqyndasýǵa nıet tanytty. Olar súıisti, qushaqtasty. Baýyrym oǵan sımpatııa tanytyp, jaýap qaıtardy. Alaıda qyz: «Syılyq ekenimdi túsindiń ǵoı?!» — degende, oǵan bul sóz unamady. Muny orynsyz dep baǵalap, ári qaraı sóılesýden bas tartty. Sol kezde Juldyz: «Men sheshindim, demek aqsha tóleýiń kerek» dedi. Artynan: «Saǵan qazir seni ornyna qoıatyn adamdar keledi» dep qorqytqan», — deıdi qaryndasy.

Baspasóz máslıhatynda kórsetilgen taǵy bir beınejazbada Juldyzdyń páterden shyqqan soń, aýlanyń ishinde júrgeni kórinedi. Qorǵaýshy taraptyń aıtýynsha, ol kadrlarda qyz sabyrly kórinedi, eshqandaı zorlyq kórgen adamǵa uqsamaıdy. Beınejazbada ol aýlanyń ishinde jalańaıaq, shalbar men bıýstgalter kıgen kúıde, qolyn basyna qoıyp júrip bara jatqan sáti túsirilgen.

Ushqyshtyń qaryndasy Juldyzdyń taǵy bir málimdemesine jaýap berdi. Qyz páterdegi tintý kezinde kúdiktiniń qoımasynan áıelderdiń kıimi men kóp mólsherde maı tabylǵanyn aıtqan bolatyn. Alaıda Abdrahmanova bunyń jalǵan ekenin aıtady:

«Quqyq qorǵaý organdarynyń resmı qujattarynda ondaı zattar tirkelmegen», — deıdi ol.

Al Juldyz bolsa, bizge bergen jaýabynda, polıeıler bul zattarǵa nazar aýdarmaǵanyn jáne olardy aıǵaq retinde tirkemegenin aıtqan.

Ushqyshtyń burynǵy qyzy bul oqıǵa týraly ne deıdi

Spıkerlerdiń aıtýynsha, ol baspasóz máslıhatyna ózi qatysqysy kelgen. Alaıda qazirgi tańda sheteldegi jarysta júr. Sondyqtan onyń áńgimesinen alynǵan aýdıojazba qosyldy.

Nadejda Juldyzben birge Qonaevtan Almatyǵa attanǵan kezin eske aldy. Olar atys klýbynyń eki jigitimen birge jol júrgen. Ol kezde, Nadejdanyń aıtýynsha, Juldyz jolaýshylarǵa ashyq qylmyńdaǵan.

«Men tanystarymnan bizdi qalaǵa jetkizip salýdy suradym. Olar kelisti. Biz kólikke otyrdyq. Ishinde eki jigit boldy. Juldyz olardan: «snaıpıngke qatysqan qymbat pa, álde praktıkalyq atys qymbat pa?» dep surap otyrdy. Negizinen bul sporttyń qymbattyǵy men oǵan kóp tabys tabý kerek ekenin talqyladyq. Iaǵnı, bul sportqa ekonomıkalyq jaǵynan qaradyq. Sonymen qatar, ol jigitterge erekshe qylymsydy. Maǵan tipti, ol solardyń ishinen jigit izdep otyrǵandaı kórindi. Al ol jigitter bolsa, edáýir egde jasta edi», — dedi Nadejda.

Sondaı-aq, Nadejda 6 qazanda bolǵan oqıǵaǵa baılanysty pikir bildirdi. Bul kúni Juldyz polıııaǵa onyń burynǵy jigitine shaǵym túsirip, Nadejda bul iske aralasýǵa májbúr bolǵan. Onyń aıtýynsha, sol kúni keshke Juldyz oǵan Instagram arqyly habarlasyp, kómek suraǵan. Nadejda oǵan kıimderin alyp kelip, sot-medıınalyq saraptama kezinde qasynda bolǵan. Tipti, sol túni ol Juldyzdy alǵash teksergen sarapshyǵa kómektesken. Sebebi maman túnde jalǵyz kezekshilikte bolǵan jáne sýretke túsirýge kómek qajet ekenin aıtqan.

Maman bolmasa da, Nadejda zorlyq belgilerin baıqamaǵanyn senimdi túrde málimdedi:

«Ol óz túsiniktemesinde tyrnaq izi, qan ketý bar dep aıtty. Biraq ondaı eshteńe bolǵan joq. Ne kógergen iz, ne jara — eshteńe bolmady. Sol kezde mende birtúrli sezim paıda boldy. Ol birdeńeni jasyryp turǵandaı boldy», — deıdi Nadejda.

Burynǵy jigiti týraly Nadejda jaqsy pikir aıtty. Ony meıirimdi, qamqor adam retinde sıpattady, eshqashan qatygezdigin baıqamaǵan. Ekeýiniń aırylysýyna sebep — Nadejda bala súıgisi kelgen, al jigiti otbasyn qurýǵa daıyn bolmaǵan.

Baspasóz máslıhatynyń qorytyndysynda Elvıra Abdrahmanova Juldyzdyń ushqyshtan qomaqty aqsha alǵysy kelgenin taǵy bir márte atap ótti.

Qylmystyq is 7 qazanda qozǵalǵan. Al 19 qazanda jábirlenýshi taraptyń advokaty qarsy tarapqa úsh mıllıon teńge kóleminde azamattyq talap joldaǵan:

«Qyzdyń ókilderi bizge faıl jiberdi. Bul — úsh mıllıon teńge kóleminde materıaldyq shyǵyndy óndirý týraly talap aryz. Aıtýynsha, Juldyz baýyrymnyń páterinde qymbat zattaryn qaldyrǵan eken. Mysaly, Dyson fırmasynyń fenin, tósek jabdyǵy jıyntyǵyn…», — dedi.

Sońynda ushqyshtyń qaryndasy qorǵaýshy taraptyń qolynda onyń kinásizdigin dáleldeıtin barlyq aıǵaqtar bar ekenin málimdedi.

Al jábirlenýshi taraptyń advokaty Ásel Sultanmýratova «Orda» tilshisine bergen suhbatynda bylaı dedi:

«Ushqyshty qorǵaý tarapynan keltirilgen ýájder shyndyqqa janaspaıdy. Qylmystyq is materıaldarynda kúdiktige taǵylǵan aıypty dáleldeıtin naqty aıǵaqtar bar», — dedi Ásel Sultanmuratova.

«Orda» bul isti ári qaraı baqylaýda ustaıdy. Tergeý áli aıaqtalǵan joq, sot qashan bastalatyny da ázirge belgisiz.