«اكىم ورىنباسارى بولىپ, دەگراداتسياعا ۇشىرايسىڭ»: شىڭعىس مۇقان مەملەكەتتىك قىزمەتتىڭ قيىندىعى تۋرالى

فوتو: اشىق دەرەككوز

گارۆارد ۋنيۆەرسيتەتىنىڭ تۇلەگى, «مازمۇنداما» جوباسىنىڭ نەگىزىن قالاۋشى شىڭعىس مۇقان جۋرناليست ەرلان ءابدىر ۇلىنا بەرگەن سۇحباتىندا اكىمنىڭ ورىنباسارى قىزمەتىنەن شەتەلگە وقۋعا نە ءۇشىن كەتكەنىن ايتتى, – دەپ حابارلايدى Alash.KZ Massaget.kzماتەريالىن نەگىزگە الىپ.

ونىڭ ايتۋىنشا, «شەتەلدە وقيمىن» دەگەن ماقساتىنا جەتۋ ءۇشىن 15 جىل قاجەت بولعان.

«3-4 جىل بۇرىن ءبىر جىگىتتەرمەن داستارحانداس بولدىق. امەريكادان وقىپ كەلگەن كەزىم ەدى. سونىڭ ىشىندەگى ەكى جىگىت شەتەلدە وقىعان ازاماتتار ەكەن. سۇراستىرسام, شەتەلگە 35-37 جاستارىندا بارىپ, وقىعان. مەن دە 32 جاسىمدا باردىم عوي. كەيىن تاعى ءبىر وتىرىستا جاستارمەن وتىرىپ قالدىم. كوپشىلىگى 20-22 جاسىندا شەتەلدەن ءبىلىم الىپ كەلگەندەر. نەگە دەسەڭىز, ءبىز اۋىلدان قالاعا كەلگەن كەزدە الماتى, استانا بىزگە شەتەل بولىپ كورىنەتىن. وسى قالانىڭ مادەنيەتىنە ەرۋدىڭ ءوزى بىزگە جەتىستىك, ۇلكەن قۋانىش ەدى. قالادا تۇراتىن ادامدارعا شەتەل كورۋ ءبىر اتتاي سالاتىن ەتاپ بولدى. سوندىقتان مەنىڭ قۇرداستارىم, توڭىرەگىمنەن «بالەنشە شەتەلدە وقىپ كەلىپتى» دەگەندەردى ەستيتىنمىن. سوسىن «مەن دە شەتەلدە وقىپ كەلەمىن» دەگەن ماقسات بولدى. بىراق ول ماقساتقا جەتۋ ءۇشىن ماعان كەمى 15 جىل قاجەت بولىپتى. ءومىرىڭدى تۇراقتاندىراسىڭ, تۇراقتى تابىسىڭ بولادى. سودان كەيىن عانا شەتەلگە باراسىڭ عوي», – دەدى ول.

شىڭعىس مۇقان مەملەكەتتىك قىزمەت دەگراداتسياعا ۇشىراتاتىنىن ايتتى.

«مەملەكەتتىك قىزمەتكە كەلۋىم قىزىق بولدى. بۇرىن «جاس الاشتا» اشىقتان اشىق سىنايتىنبىز عوي. سول ءۇشىن مەملەكەتتىك قىزمەتتى كورگىم كەلدى. بىراق مەملەكەتتىك قىزمەتتە كوپ ىستەمەدىم. اتىراۋ وبلىسى اكىمىنىڭ ورىنباسارى بولىپ ءتورت جىل قىزمەت ەتتىم. كۇندەلىكتى ءبىر نارسەنى ىستەي بەرەمىز. كەلەسى جىل سول قايتالانادى. ء«بىز دۇرىس ىستەپ جاتىرمىز با» دەپ ويلاناتىنمىن. ءسويتىپ, بۇرىنعى «شەتەلدە وقيمىن» دەگەن ماقساتىم قوسىلىپ, ەكى جىل شەتەلدە ءبىلىم الىپ كەلدىم. وڭاي بولمادى, بىراق وكىنبەدىم. اكىم ورىنباسارى بولىپ, دەگراداتسياعا ۇشىرايسىڭ», – دەدى ول.