«Ákimdiktiń shyrshasyna beıshara muǵalimderdi jumsaıdy»: Semeıdegi ustazdyń jary mán-jaıdy baıandady

Semeıde jańajyldyq shyrshany bezendirý kezinde zardap shekken Qýat Aıtqalıev esimdi muǵalimniń jary oqıǵaǵa pikir bildirdi, – dep habarlaıdy qandastar.kz aqparat portaly Massaget.kz-ke silteme jasap.

Shyrsha bezendirý kezinde bıikten qulaǵan №49 mekteptiń qazaq tili men ádebıeti pániniń muǵalimi Qýat Aıtqalıevtiń jary Symbat Aıanqyzy da mektep muǵalimi. Ol oqıǵanyń qalaı bolǵanyn baıandady.

«Oqıǵadan bir kún buryn kúıeýime dosy habarlasty. «Tańǵy saǵat 9-da shyrsha qurýǵa barasyńdar» degen buıryq kelgen. Ertesi kúni 9 jarymda sol jerde bolǵan. Bezendirý kezinde 4 metr bıiktikten qulaǵan. Oqıǵa ornyna birden jettim. Men kelsem operaııaǵa alyp ketken eken. Jaǵdaıyn óte aýyr dep baǵalady dárigerler. Olardyń sózinshe, joldasymnyń bas súıegi synǵan» dedi muǵalimniń jary.

Symbat Aıanqyzy oqys oqıǵadan zardap shekken joldasynyń bul jaǵdaıyna bilim bóliminen bólek, ákimdik te kináli dep sanaıdy. Onyń aıtýynsha, Qýat Aıtqalıev qurýǵa barǵan shyrsha ákimdiktiń shyrshasy.

«Bul pedagogtyń kásibı quzyrettiligine kirmeıtin sharýa. Buǵan tek bilim bólimi ǵana emes, ákimdik te kináli. Ákimdik tikeleı bilim bólimine buıryq bergen. Bul – ákimdiktiń shyrshasy. Oǵan aparyp beıshara muǵalimderdi jumsaıdy. Joldasymnyń jaǵdaıy qalaı bolatynyn bilmeımin. Biraq bul óte aýyr jaǵdaı» dedi ol.

Áıeliniń sózinshe ol shyrsha qurýǵa óz erkimen barmaǵan. Oǵan basshylyqtan buıryq kelip, sol buıryqty oryndaýǵa ketken deıdi.

«Ol shyrshaǵa aıaǵymen kádimgideı shyqqan. Kóbi aıtyp jatyr ǵoı, óz erkimen keldi dep. Joq, ol óz erkimen barǵan joq. Olarǵa baryńdar dep aıtty. Solaı ol bardy. Senbi kúni jumysqa shyqqany úshin qosymsha aqsha tóleıdi dep eshteńe aıtpaǵan da. Dırektor aıtty dep bardy» dep jaýap berdi muǵalimniń jary Symbat Aıanqyzy.