«اكىمنەن نەكەسىز بالام بار»: نۇرداۋلەت قيلىباي ءوز شىندىعىن ايتتى

ماڭعىستاۋ وبلىسىنىڭ اكىمى نۇرداۋلەت قيلىباي استانادا وتكەن بريفينگ بارىسىندا جەلىدە وزىنەن بالام بار دەگەن بويجەتكەن تۋرالى ءوز شىندىعىن ايتتى, دەپ حابارلايدى Qandastar.kz اقپارات پورتالى.

بريفينگ مودەراتورى قانشا كەدەرگى جاساۋعا تىرىسقانىمەن جۋرناليست اكىمنەن: «ەكس-دەپۋتات ىنتاش ناۋرىزوۆانىڭ ايتقاندارى قانشالىقتى شىندىققا جاناسادى, بۇل راس پا? ول سىزدەن ۇلدى بولعانىن, قازىرگى كۇنى اليمەنت تولەمەي جۇرگەنىڭىزدى ايتۋدا» دەپ سۇرادى.

نۇرداۋلەت قيلىباي بۇل ساۋالعا وزىنشە جاۋاپ بەردى.

«جادىرا, دوستارىڭىز بار ما? مەن سىزگە وسىنداي جەكە سۇراقتاردى سولارعا قويۋ كەرەكتىگىن ايتقىم كەلەدى. جەكە شەكارا دەگەن بار. جەلىدە جازىلعاننىڭ ءبارى, تاراعاننىڭ ءبارى شىندىق ەمەس. ماعان قاتىستى ءتۇرلى اقپاراتتار جازىلادى. مەن ونىڭ بىرىمەن كەلىسسەم, تاعى بىرىمەن كەلىسپەيمىن. تاعى ءبىر اقپاراتتاردى مۇلدە جوققا شىعارامىن دەپ جاۋاپ بەرە الامىن. مەنىڭشە مۇنداي جەكە سۇراقتاردى ءوز دوستارىڭىزعا قويعانىڭىز دۇرىس», — دەپ جاۋاپ بەرگەن ماڭعىستاۋ وبلىسىنىڭ اكىمى نۇرداۋلەت قيلىباي.

ايتا كەتەيىك, ىنتاش ناۋرىزوۆا ەسىمدى جەلى قولدانۋشىسى وبلىس اكىمى نۇرداۋلەت قيلىبايدان نەكەسىز بالاسى بارىن ايتقان ەدى.