«اكىمنىڭ جۇمىسىنا سىن كوزبەن قاراۋ – دەموكراتيالىق قوعامعا ءتان قالىپتى نارسە»

فوتو: اقوردا

ءماسليحاتتار دەپۋتاتتارىنىڭ ءىى رەسپۋبليكالىق فورۋمىندا سويلەگەن سوزىندە پرەزيدەنت ءماسليحاتتار مەن اكىمدىكتەر ءوزارا ۇيلەسىمدى جۇمىس ىستەۋى كەرەك ەكەنىنە توقتالدى, دەپ حابارلايدى qandastar.kz اقوردانىڭ ءباسپاسوز قىزمەتىنە سىلتەمە جاساپ.

«رەفورمانىڭ ارقاسىندا ەلىمىزدەگى اكىمدەر ينستيتۋتى ايتارلىقتاي وزگەردى. اۋىل اكىمىن تىكەلەي سايلاۋ تاسىلىنە ءبىرجولا كوشتىك. از ۋاقىتتىڭ ىشىندە اۋىل اكىمدەرىنىڭ 90 پايىزىنا جۋىعى جاڭاردى. سونداي-اق اۋدان جانە وبلىستىق ماڭىزى بار قالا اكىمدەرىن سايلاۋ جۇيەسىن پيلوتتىق جوبا رەتىندە سىناپ كوردىك. بيىلعى جولداۋدا ايتتىم, ولاردىڭ ءبارى جاڭا جىلدان باستاپ سايلاناتىن بولادى. وسىلايشا, باستى بيلىك تارماقتارى تۇگەل سايلاۋ جۇيەسىنە كوشتى. قازاقستان تاريحىندا ەشقاشان ونداي تاجىريبە بولماعان. ءتىپتى, مۇنداي اۋقىمدى رەفورما وسى ايماقتا ءبىزدىڭ ەلدە عانا جاسالىپ جاتىر دەۋگە تولىق نەگىز بار. مۇنىڭ ءبارى – دەموكراتيالىق دامۋ جولىنداعى ايرىقشا ماڭىزدى قادامدار», دەدى پرەزيدەنت.

پرەزيدەنت اكىمدەردى تىكەلەي سايلاۋ ماسەلەسىنە دە توقتالا كەتتى.

«ەلىمىزدە حالىقتىڭ جارتىسىنا جۋىعى اۋىلدا, اۋداندا تۇرادى. سوندىقتان ازاماتتاردىڭ كوپشىلىگى ءۇشىن تىكەلەي سايلاۋ ۇيرەنشىكتى, قالىپتى نارسەگە اينالدى. بۇل جاعداي جۇرتتىڭ سايلاۋ مادەنيەتىن كوتەرەدى, ساياسي ينستيتۋتتاردى نىعايتادى. جالپى, اكىمدەردى تىكەلەي سايلاۋ جۇيەسى ەلىمىزدە جاڭا ساياسي احۋالدىڭ قالىپتاسۋىنا جول اشتى. جەرگىلىكتى اتقارۋشى بيلىككە جاڭا بۋىن وكىلدەرى كوپتەپ كەلە باستادى. كاسىپكەرلەردىڭ, قوعامداعى بەلسەندى ازاماتتاردىڭ, جاستاردىڭ اراسىنان شىققان اكىمدەر از ەمەس. قازىر ولار ەل باسقارۋ ءىسىن ۇيرەنىپ, تاجىريبە جيناپ جاتىر. جەدەل شەشىم قابىلداپ, جۇمىستى دەر كەزىندە ۇيىمداستىرۋعا بەيىمدەلىپ كەلەدى. بۇل قىستا جىلۋ-ەنەرگەتيكا سالاسىندا كۇردەلى جاعداي بولعان كەزدە انىق بايقالدى. كوكتەمدەگى تاسقىن دا كىمنىڭ قولىنان ءىس كەلەتىنىن ناقتى كورسەتتى. شارۋاعا شيراق ءارى ەلگە جاناشىر ازاماتتاردىڭ اكىم بولعانى دۇرىس. ولارعا جان-جاقتى قولداۋ كورسەتۋ كەرەك. اسىرەسە, ءماسليحات دەپۋتاتتارى مەن اكىمدەردىڭ بىرلەسە جۇمىس ىستەگەنى ءجون. ويتكەنى ولاردى مەملەكەتتىڭ جەرگىلىكتى جەردەگى قوس تىرەگى دەۋگە بولادى», دەدى مەملەكەت باسشىسى.

ايتۋىنشا, قوعامنىڭ اكىمدەرگە قوياتىن تالابى قاشاندا جوعارى.

«قوعامنىڭ اكىمدەرگە قوياتىن تالابى قاشاندا جوعارى. بۇل – زاڭدى قۇبىلىس. اكىمنىڭ جۇمىسىنا سىن كوزبەن قاراۋ – دەموكراتيالىق قوعامعا ءتان قالىپتى نارسە. بىراق سىناعاننىڭ ءجونى وسى ەكەن دەپ, تىم ارتىق كەتەتىن اسىرە بەلسەندىلەر دە بار. ءوزىن بلوگەر سانايتىن كەيبىر ادامدار اكىمنىڭ ءار قادامىن اڭدۋدى ادەتكە اينالدىردى. جۇمىسقا كەدەرگى جاساپ, ءتىپتى, قوقان-لوقى كورسەتەتىندەر بار. ارينە, اۋىل, اۋدان نەمەسە قالا تۇرعىندارى بولسىن, بارلىعى جايلى ءومىر سۇرگىسى كەلەدى. ازاماتتارعا بارىنشا قولايلى جاعداي جاساۋ – اكىمگە دە, جەرگىلىكتى ماسليحاتتارعا دا ورتاق مىندەت.

ءاربىر اكىم ازاماتتارمەن ديالوگقا اشىق بولۋى قاجەت, سىندارلى پىكىر الماسا ءبىلۋى كەرەك. بىراق جۇرتتى دۇرلىكتىرىپ, شۋ شىعارىپ, زاڭدى بۇزۋعا جول بەرىلمەيدى. ەشكىم زاڭنان اتتاماۋعا ءتيىس. مەملەكەت مۇددەسى ءتۇرلى پوپۋليستەردىڭ جەكە مۇددەسىنەن جوعارى تۇرۋى قاجەت. قوعامنىڭ سىنىنان جانە باتىل شەشىم قابىلداپ, جاۋاپكەرشىلىك الۋدان قورىقپاۋ كەرەك. كەز كەلگەن وزەكتى ماسەلەگە, سونىڭ ىشىندە اقپاراتتىق شابۋىلدارعا دەر كەزىندە نازار اۋدارۋ قاجەت. تاعى دا قايتالاپ ايتامىن. اكىمدىكتەر مەن ءماسليحاتتاردىڭ مىندەتى – مەملەكەتتىك ساياساتتى قاتاڭ ۇستانۋ, ونى ەل مۇددەسىنە ساي جۇزەگە اسىرۋ. ءماسليحات دەپۋتاتتارىنىڭ جۇمىسىنداعى باسىم باعىتتارعا قاتىستى مەنىڭ پايىمىم وسىنداي», دەدى پرەزيدەنت.